نیلم۔11اگست (اے پی پی):وادی نیلم کے علاقے کیل میں معرکہ حق اور جشنِ آزادی کی مناسبت سے نیلم کلچرل فیسٹیول کا شاندار انعقاد کیا گیا، پاک فوج اور آزاد کشمیر کلچرل اکیڈمی کے اشتراک سے منعقدہ فیسٹیول میں مقامی افراد کی بڑی تعداد نے شرکت کی۔ سکول کے بچوں نے ٹیبلو، کالج طلبہ نے شینہ زبان میں ملی نغمہ پیش کیا، جبکہ روایتی رقص "گتکا” نے شرکاء کو خوب محظوظ کیا۔
اس موقع پر جشنِ آزادی اور معرکہ حق میں کامیابی کے موضوع پر تقاریر ہوئیں، ساتھ ہی ماحولیاتی تحفظ اور سیاحت کے فروغ کے حوالے سے عوام کو آگاہی دی گئی۔چیف سیکرٹری خوشحال خان نے بطور مہمانِ خصوصی شرکت کی اور شرکاء میں انعامات اور سووینئر تقسیم کیے۔
مقامی عوام نے اس ثقافتی میلے کو اتحاد، یکجہتی اور ثقافتی ورثے کے فروغ کا اہم ذریعہ قرار دیا اور معرکہ حق میں تاریخی کامیابی پر افواجِ پاکستان کو زبردست خراجِ تحسین پیش کیا۔عوام نے فیسٹیول کے کامیاب انعقاد پر منتظمین کی کاوشوں کو سراہتے ہوئے گہری خوشی کا اظہار کیا۔
