اسلام آباد۔29اپریل (اے پی پی):نیشنل الیکٹرک پاور ریگولیٹری اتھارٹی (نیپرا) نے بجلی کی تقسیم کار کمپنیوں (ڈسکوز) کےمارچ کے ماہانہ فیول چارجز ایڈجسٹمنٹ کے حوالے سے جمع کروائی گئی درخواست پر عوامی سماعت مکمل کر لی۔ منگل کونیپرا کی جانب سے جاری اعلامیہ کے مطابق چیئرمین نیپرا کی زیر صدارت عوامی سماعت میں سی پی پی اے جی کے عہدیدار، بزنس کمیونٹی، وزارت توانائی کے نمائندوں ،صحافیوں سمیت شہریوں کی بڑی تعداد نے شرکت کی۔سی پی پی اے جی نے ایف سی اے کی مد میں 3 پیسے فی یونٹ کمی کی درخواست جمع کروائی تھی، سی پی پی اے جی کی جانب سے مسلسل 9 ماہ سے ایف سی اے کی مد میں کمی کی درخواست کی گئی۔ نیپرا کے مطابق کمی کا اطلاق ڈسکوز کے تمام صارفین ماسوائے لائف لائن ، پروٹیکٹڈ صارفین ،پری پیڈ صارفین اور الیکٹرک وہیکل چارجنگ سٹیشنز پر ہوگا جبکہ اس کا اطلاق کے الیکٹرک صارفین پربھی نہیں ہو گا۔ اتھارٹی ڈیٹا کی مزید جانچ پڑتال کے بعد اپنا تفصیلی فیصلہ جاری کرے گی۔
