اسلام آباد۔11اکتوبر (اے پی پی):وزیراعظم محمدشہبازشریف ایشیا میں روابط اور اعتمادسازی کے اقدامات (سیکا)سے متعلق کانفرنس کے دوروزہ چھٹے سربراہ اجلاس میں شرکت کریں گے، وزیراعظم 13 اکتوبر کو کانفرنس کے افتتاحی اجلاس سے کلیدی خطاب کریں گے۔
منگل کو وزارت خارجہ سے جاری بیان کے مطابق وزیراعظم محمدشہبازشریف قزاخستان کے دارالحکومت آستانہ میں’’ ایشیا میں روابط اور اعتمادسازی کے اقدامات‘‘ (سیکا)سے متعلق کانفرنس کے دو روزہ (12، 13 اکتوبر ) کو ہونے والے چھٹے سربراہ اجلاس میں شرکت کریں گے۔
کابینہ اراکین اوراعلیٰ حکام بھی ان کے ہمراہ ہوں گے۔ وزیراعظم 13 اکتوبر کو کانفرنس کے افتتاحی اجلاس سے کلیدی خطاب کریں گے۔ وہ اپنے خطاب میں ایشیائی ممالک کو درپیش مشترکہ چیلنجز سے نمٹنے کے لئے بات چیت ، سمجھوتہ اور تعاون کے فروغ کے لئے سیکا کی منفردفورم کے طورپر اہمیت اجاگر کریں گے۔ وزیراعظم علاقائی و عالمی امور پر پاکستان کا نکتہ نظر بھی اجاگر کریں گے۔ سربراہ اجلاس کے موقع پر وزیراعظم سیکا کے ارکان ممالک کے ساتھ دو طرفہ ملاقاتیں بھی کریں گے جن کا مقصدبالخصوص تجارت، سرمایہ کاری اور توانائی کے شعبوں میں وسیع تعاون کو فروغ دینا ہے۔سیکا ایشیا بھر کے 27 ممالک پر مشتمل بین الحکومتی فورم ہے جو کہ 1992 میں قائم کیا گیا۔ اس میں برصغیر ایشیا میں امن ، سلامتی اور سماجی و معاشی ترقی کے فروغ پر توجہ دی جاتی ہے۔
سیکا مذکرات اور تعاون کے ذریعے علاقائی استحکام اور خوشحالی کے اہداف کے حصول کے لئے قابل قدر فورم ہے۔ یہ فورم 5 بڑے شعبوں میں اعتمادسازی کے اقدامات کو فروغ دیتا ہے جس میں معاشی سمت، ماحولیاتی سمت، انسانی سمت، نئے چیلنجز اور خطرات اور فوجی و سیاسی سمت شامل ہیں۔ سیکا کے منشور اور اہداف کے تناظر میں وزیراعظم کی سربراہ اجلاس میں شرکت سے یہ واضح ہوتا ہے کہ پاکستان ایشیا میں روابط اور معاشی تعاون کے فروغ کو انتہائی اہمیت دیتا ہے
