آستانہ۔13اکتوبر (اے پی پی):وزیراعظم محمد شہبازشریف اور تاجکستان کے صدر امام علی رحمان نے دونوں ممالک کے درمیان معیشت،تجارت ، توانائی اور روابط کے شعبوں میں تعلقات کو مضبوط بنانے، کاسا 1000 منصوبے کی جلد تکمیل اور خطے میں امن ، استحکام اورسلامتی کے لئے مل کر کام کرنے کی ضرورت پر اتفاق کیاہے ۔ یہ اتفاق رائے جمعرات کو یہاں رابطوں کے فروغ واعتماد سازی کے اقدامات "سیکا” کے چھٹے سربراہی اجلاس کے موقع پر ملاقات میں ہوا۔
وزیراعظم نے تاجکستان کے صدر کو ملک میں تباہ کن سیلاب کے بعد حکومت کی جانب سے شروع کیے جانے والے بحالی کے کاموں کے بارے میں آگاہ کیا۔ انہوں نے ماحولیاتی تبدیلیوں سے پیدا ہونے والی قدرتی آفات کے بڑھتے ہوئے خطرے سے نمٹنے کے لیے مشترکہ کوششیں کرنے کی ضرورت پر زور دیا۔ صدر امام علی رحمان نے انہیں اس سلسلے میں تاجکستان کی جانب سے مسلسل تعاون کی یقین دہانی کرائی جس میں سیلاب سے متعلق ضروری امدادی سامان لے جانے والے ٹرکوں کے اضافی قافلے کی روانگی بھی شامل ہے۔
وزیر اعظم نے گزشتہ ماہ سمرقند میں شنگھائی تعاون تنظیم کے سربراہ اجلاس کے موقع پر تاجک صدر کے ساتھ اپنی ملاقات کا ذکر کیا اور مختلف شعبوں میں مسلسل بڑھتے ہوئے دوطرفہ تعلقات پر اطمینان کا اظہار کیا۔ دونوں رہنماؤں نے اعلیٰ سطح کے رابطوں، بین الپارلیمانی روابط اور تکنیکی سطح کی ملاقاتوں کو مزید بڑھانے پر اتفاق کیا تاکہ ٹھوس تعاون کو مزید فروغ دیا جا سکے۔
وزیراعظم نے توانائی کے شعبے میں تعاون بڑھانے کی ضرورت پر زور دیا۔اس موقع پر کاسا 1000 منصوبے کی جلد تکمیل کے لیے مل کر کام کرنے پر اتفاق کیا گیا، جو وسطی ایشیا کے ساتھ مستقبل میں توانائی کی راہداریوں کا مرکز ہوگا۔ وزیراعظم نے خطے میں رابطوں کو فروغ دینے کی اہمیت کو اجاگر کرتے ہوئے روڈ ٹرانسپورٹ اور فضائی رابطوں کے شعبے میں تعاون کو وسعت دینے پر زور دیا۔
انہوں نے تاجکستان کو گوادر اور کراچی بندرگاہوں تک رسائی فراہم کرنے کے لیے پاکستان کی آمادگی کا اعادہ کیا۔دونوں رہنماؤں نے باہمی دلچسپی کے علاقائی اور عالمی امور پر بھی تبادلہ خیال کیا اور خطے میں امن، استحکام اور سلامتی کو مضبوط بنانے کے لیے مل کر کام کرنے کی ضرورت پر اتفاق کیا۔دونوں رہنماؤں نے وسیع تر اقتصادی تعاون بالخصوص تجارت، توانائی اورزمینی و فضائی رابطے کے شعبوں میں اپنے تعلقات کو مضبوط بنانے پر بھی اتفاق کیا۔
Short Link: https://urdu.app.com.pk/urdu/?p=332419
