لاہور۔6جولائی (اے پی پی):وزیراعظم محمد شہباز شریف سے وفاقی وزیر داخلہ سید محسن رضا نقوی نے ملاقات کی اور یوم عاشور کے موقع پر ملک بھر کی صورتحال اور سکیورٹی کے حوالے سے کئے گئے انتظامات پر وزیر اعظم کو بریفنگ دی۔
وزیراعظم آفس کے پریس ونگ کے مطابق وزیراعظم شہباز شریف نے صوبوں کے وزرائے اعلیٰ مریم نواز، مراد علی شاہ، علی امین گنڈاپور، میر سرفراز بگٹی اور وزیر اعظم آزاد جموں کشمیر چودھری انوار الحق، وزیر اعلی گلگت بلتستان گلبر خان کو یوم عاشور کے موقع پر اپنے اپنے علاقوں میں مؤثر سیکیورٹی انتظامات کرنے پر خراج تحسین پیش کیا ۔
وزیراعظم نے صوبائی انتظامیہ، پولیس، سکیورٹی فورسز اور رینجرز کی بھی پزیرائی کی ۔ وزیر اعظم نے کہا کہ صوبائی حکومتوں اور سکیورٹی فورسز کی مؤثر اور پیشہ ورانہ منصوبہ بندی کی بدولت عوام کے لیے یوم عاشور کا پر امن اور پر سکون انعقاد ممکن ہوا ہے۔
وزیر داخلہ محسن نقوی نے وزیراعظم کو بتایا کہ حکومت نے یوم عاشور کے موقع پر سکیورٹی کے انتظامات اور عوام کو سہولیات فراہم کرنے کے لیے تمام تر اقدامات اٹھائے ۔وزیراعظم نے وفاقی وزیر داخلہ محسن نقوی کو عاشورہ کے انتظامات احسن طریقے سے کرنے پر سراہا۔
