وزیراعظم شہباز شریف نے پاکستان میں سیلاب کی صورتحال کے پیش نظر لندن کا دورہ منسوخ کر دیا

اسلام آباد۔25اگست (اے پی پی):وزیراعظم شہباز شریف نے پاکستان میں سیلاب کی صورتحال کے پیش نظر لندن کا دورہ منسوخ کر دیا ۔جمعرات کو وزیراعظم آفس کے میڈیا ونگ سےجاری بیان کے مطابق وزیراعظم نے سیلاب کی صورتحال اور امدادی کارروائیوں سے متعلق اجلاس ان کے وطن واپس پہنچتے ہی منعقد کرنے کی ہدایت کردی ۔

اجلاس میں این ڈی ایم اے سمیت دیگر حکام وزیراعظم کو سیلاب متاثرین کے ریسکیو اور ریلیف سے متعلق اقدامات سے آگاہ کریں گے۔

وزیراعظم شہباز شریف نے حمزہ شہباز کی بیٹی اور اپنی پوتی کی طبعیت کی ناسازی کی وجہ سے قطر سے لندن جانا تھا لیکن ملک میں سیلاب کی صورتحال کے باعث وزیراعظم نے فوری وطن واپسی کا فیصلہ کیا ۔ وزیراعظم کی پوتی لندن میں زیر علاج ہے

Short Link: https://urdu.app.com.pk/urdu/?p=323712