اسلام آباد۔30مارچ (اے پی پی):وزیراعظم شہباز شریف نے لائرز ویلفئیر اینڈ پروٹیکشن بل 2023 کی منظوری پر ملک بھر کی وکلاء برادری کو مبارک دیتے ہوئے کہا ہے کہ اللہ کا شکر ہے کہ وکلاء برادری سے کیا ہوا وعدہ پورا کر دیا ہے۔جمعرات کو وزیر اعظم میڈیا ونگ سے جاری بیان کے مطابق وزیر اعظم نے کہا کہ ایک ماہ قبل وکلاء نے مجھ سے ملاقات کی تھی اور میں نے ان سے یہ قانون جلد منظور کرانے کا وعدہ کیا تھا۔
وزیر اعظم نے کہا کہ وکلاء نے اپنی جانوں کے نذرانے پیش کئے ہیں، ان کا تحفظ اور فلاح و بہبود ہماری اولین ترجیح ہے۔پارلیمنٹ کے دونوں ایوانوں کے ارکان قابل تعریف ہیں جنہوں نے ایک نئی تاریخ لکھی ہے،سب کے حقوق کے لئے لڑنے والے وکلاء کے اپنے حقوق کے حوالے سے وہ پیش رفت نہیں ہوئی جو ہونی چاہیے تھی۔وکلاء برادری کی مزید بہتری کے لئے اپنا کردار ادا کرتے رہیں گے۔
Short Link: https://urdu.app.com.pk/urdu/?p=357779
