اسلام آباد۔17فروری (اے پی پی):وزیراعظم عمران خان آج جمعرات کو ملک بھر کے طلباکے لیے سکالرشپ کمپلینٹ پورٹل کا اجرا کریں گے۔ وزیراعظم آفس کے میڈیا و نگ سے جاری بیان کے مطابق وزیر اعظم کی خصوصی ہدایت پر ملک بھر کے طلبا کے لیے سکالرشپ کمپلینٹ پورٹل کا اجرا کیا جا رہا ہے۔
اس پورٹل کا بنیادی مقصد اسکالرشپ پر تعلیم حاصل کرنے والے طلبا کو درپیش مسائل فوری حل کرنا ہے۔مستحق اور ذہین طلبا کی تعلیم پر حکومت سکالرشپس کے لیے 28 ارب روپے سے زائد رقم خرچ کر رہی ہے۔ اس وقت 26لاکھ طلبا بشمول 72 فیصد طالبات سکالرشپ سے مستفید ہو رہے ہیں۔
ان وسائل کے صحیح استعمال، میرٹ اور شفافیت کو یقینی بنانے کے لیے سکالرشپ کمپلینٹ پورٹل مدد فراہم کرے گی۔یہ پورٹل وزیراعظم سیٹیزن پورٹل سے منسلک ہوگا اور وزیر اعظم آفس شکایات کے بروقت ازالے کی نگرانی کرے گا۔
