اسلام آباد ۔ 16 مئی (اے پی پی) وزیراعظم عمران خان نے نوجوانوں کی فلاح و بہبود کے سلسلہ میں موجودہ حکومت کے وژن کو عملی جامہ پہنانے کےلئے ایک جامع اورمربوط پروگرام ”وزیرِاعظم کامیاب جوان پروگرام“ کی اصولی منظوری دےدی۔ وہ جمعرات کو ”وزیرِاعظم کامیاب جوان پروگرام“ کے سلسلہ میں وزیراعظم آفس میں منعقد ہونے والے خصوصی اجلاس کی صدرات کر رہے تھے۔ معاون خصوصی محمد عثمان ڈار نے وزیرِاعظم عمران خان کو ”وزیرِاعظم کامیاب جوان پروگرام“ اور اس کے تحت نوجوانوں کےلئے کئے جانے والے مختلف اقدامات پر بریفنگ دی۔ وزیرِاعظم کو بتایا گیا کہ ماضی میں کثیر رقوم خرچ کرنے کے باوجود بھی کوئی مربوط اور مناسب حکمت عملی نہ ہونے کے سبب نوجوانوں کےلئے شروع کئے جانے والے پروگراموں سے مطلوبہ نتائج حاصل نہیں ہو سکے۔ وزیرِاعظم کو بتایا گیا کہ ”کامیاب جوان پروگرام“ کے تحت نوجوانوں کو روزگار، تعلیم کی فراہمی کے علاوہ انہیں ہنرمند بنانے اور ان کی تعمیری صلاحیتیوں کو مثبت طور پر بروئے کار لانے کےلئے مختلف پروگراموں کا اجراءکیا جائے گا۔ وزیرِاعظم کو بتایا گیا کہ سٹرٹیجک یوتھ ڈویلپمنٹ روڈ میپ کے تحت نیشنل یوتھ ڈویلپمنٹ فریم ورک مرتب کیا جا چکا ہے، نوجوانوں کی ایک نیشنل یوتھ کونسل بھی تشکیل دی جا چکی ہے۔ وزیرِاعظم کو بتایا گیا کہ ملکی تاریخ میں پہلی دفعہ وزیرِاعظم یوتھ پلس پورٹل کی مدد سے نوجوانوں سے فیڈ بیک حاصل کیا جائے گا تاکہ جہاں ملکی تعمیر و ترقی میں نوجوانوں کی آراءکو شامل کیا جا سکے وہاں ان کی تجاویز کو مدنظر رکھ کر پالیسیاں بھی تشکیل دی جائیں۔ وزیرِاعظم کو بتایا گیا کہ ملکی تاریخ میں پہلی دفعہ ”کامیاب جوان پروگرام“ کے تحت نیشنل یوتھ ڈویلپمنٹ انڈیکس مرتب کیا جائے گا۔ وزیرِاعظم کو بتایا گیا کہ کامیاب جوان پروگرام کے تحت 40 سے زائد شعبہ جات کی نشاندہی کی جا چکی ہے جس کے ضمن میں صوبائی اور وفاقی محکموں میں اشتراک کار کا عمل شروع کیا جا چکا ہے تاکہ ان شعبوں میں نوجوانوں کی فلاح و بہبود کو یقینی بنایا جا سکے۔ ”کامیاب جوان پروگرام“ کے تحت شروع کئے جانے والے مختلف پروگرامز میں یوتھ اکنامک ڈویلپمنٹ امپاورمنٹ پروگرام، وزیرِاعظم گرین یوتھ موومنٹ، پی ایم سٹارٹ اپ پاکستان، انٹرن شپ پروگرام، ہنرمند پروگرام، کامیاب جوان ایمپلائمنٹ ایکسچینج پروگرام جیسے منصوبے شامل ہیں۔ وزیراعظم کو بتایا گیا کہ ملکی تاریخ میں پہلی دفعہ یونیورسٹیوں اور فنی تعلیم کے اداروں کی جانب سے ہنرمند جوانوں کے بارے میں فراہم کردہ معلومات کی بنیاد پر ایک ڈیٹا بیس، پرایم منسٹر ایمپلائمنٹ ایکسچینج پلیٹ فارم بنایا جائے گا اور اس پلیٹ فارم کو تمام قومی اداروں سے منسلک کیا جائے گا تاکہ ان اداروں میں خالی آسامیوں کے بارے میں معلومات میسر آ سکیں اور ہنرمند نوجوانوں کو نوکریوں کی تلاش اور فراہمی میں مدد ملے۔ وزیرِاعظم کو بتایا گیا کہ وزیرِاعظم سٹارٹ اپ پاکستان پروگرام کے تحت نوجوانوں کو کاربار کےلئے آسان شرائط پر قرضے فراہم کئے جائیں گے۔ اس کے علاوہ گرین یوتھ موومنٹ میں نوجوانوں کی شمولیت کو یقینی بنایا جائے گا۔ وزیرِاعظم نے جامع اور مفصل پروگرام تشکیل دینے پر معاون خصوصی محمد عثمان ڈارکی کاوشوں کو سراہا۔ وزیرِاعظم کی جانب سے اصولی منظوری کے بعد پروگرام کو کابینہ کی منظوری کےلئے پیش کیا جائے گا جس کے بعد اس پروگرام کا باقاعدہ اعلان کیا جائے گا۔
