اسلام آباد ۔ 18 ستمبر (اے پی پی) وزیراعظم عمران خان نے گزشتہ روز افغانستان میں ہونے والے دو دہشت گرد حملوں میں معصوم شہریوں کی ہلاکت پر ہمدردی اور تعزیت کا اظہار کیا ہے ۔ بدھ کو افغان صدر اشرف غنی سے ٹیلی فون پر بات چیت کرتے ہوئے وزیراعظم نے پاکستان کی طرف سے حملوں کی مذمت کی۔ وزیراعظم نے صدر اشرف غنی کی خیریت دریافت کی جو کہ دھماکہ کے وقت انتخابی ریلی میں موجود تھے۔ انہوں نے کہا کہ پاکستان، افغانستان میں مکمل امن و استحکام کی بحالی کے لئے اپنی حمایت جاری رکھے گا۔
