اسلام آباد۔29دسمبر (اے پی پی):وزیراعظم عمران خان نے پاکستان کی ڈائمنڈ جوبلی تقریبات شایان شان طریقے سے منانے کی ہدایت کرتے ہوئے کہا ہے کہ پاکستان کی 75ویں سالگرہ پر نوجوانوں کو پاکستان کے قیام کا مقصد اور علامہ اقبال کے پیغام کی اصل تشریح سمجھانے کی ضرورت ہے، قدرت نے پاکستان کو ہر قسم کی نعمت سے نوازا ہے جن کو اجاگر کرنے کی ضرورت ہے۔ ا ن خیالات کا اظہار انہوں نے بدھ کو پاکستان کی ڈائمنڈ جوبلی 2022 کی تقریبات کی تیاری کے حوالہ سے جائزہ اجلاس کی صدارت کرتے ہوئے کیا۔
اجلاس میں وفاقی وزیر اطلاعات و نشریات چوہدری فواد حسین، وفاقی وزیر خزانہ شوکت فیاض ترین، معاونین خصوصی ڈاکٹر شہباز گل، شہزاد نواز اور سینئر افسران نے شرکت کی۔ اجلاس میں وفاقی وزیر اطلاعات و نشریات چوہدری فواد حسین نے وزیر اعظم عمران خان کو تقریبات کی تیاریوں کے حوالے سے تفصیلی بریفنگ دی۔
اجلاس کو بتایا گیا کے ڈائمنڈ جوبلی کے حوالہ سے پاکستان کی تاریخ، ثقافت قومی ہیروز، تحریک پاکستان کی نامور خواتین، مقامی کھیلوں، سیاحت، معیشت، گرین پاکستان اور دوست ممالک کے ساتھ تعلقات کے حوالے سے ڈاکومنٹریز اور تقریبات منعقد کی جائیں گی۔
وزیراعظم عمران خان نے کہا کہ پاکستان کی ڈائمنڈ جوبلی تقریبات شایان شان طریقے سے منائی جائیں، ان تقریبات کا مقصد پاکستان کے الگ تشخص، ثقافت اور منفرد جغرافیہ کو اجاگر کرنا ہے۔ انہوں نے کہا کہ پاکستان کی 75ویں سالگرہ پر نوجوانوں کو پاکستان کے قیام کا مقصد اور علامہ اقبال کے پیغام کی اصل تشریح سمجھانے کی ضرورت ہے، قدرت نے پاکستان کو ہر قسم کی نعمت سے نوازا ہے جن کو اجاگر کرنے کی ضرورت ہے۔
