اسلام آباد ۔ 25 ستمبر (اے پی پی) وزیراعظم عمران خان نے کہا ہے کہ بلوچستان کی سماجی و اقتصادی ترقی وفاقی حکومت کی اولین ترجیحات میں شامل ہے، بلوچستان کے پسماندہ علاقوں کی ترقی اور سیلاب سے متاثرہ علاقوں میں بحالی کے لئے ہر ممکن اقدامات اٹھائے جائیں گے۔ ان خیالات کا اظہار انہوں نے صوبائی وزیر برائے تعلیم بلوچستان سردار یار محمد رند سے ملاقات میں گفتگو کرتے ہوئے کیا۔ ملاقات میں صوبہ بلوچستان کی مجموعی صورتحال، سیلاب سے متاثرہ علاقوں، بشمول نصیر آباد میں بحالی کے اقدامات، میگا ترقیاتی منصوبوں، سکلیجی ڈیم پر پیشرفت اور پارٹی کے حوالے سے امور پر گفتگو کی گئی۔ وزیراعظم عمران خان نے بلوچستان کی ترقی و خوشحالی کے حوالے سے ذکر کرتے ہوئے کہا کہ بلوچستان کی سماجی و اقتصادی ترقی وفاقی حکومت کی اولین ترجیحات میں شامل ہے۔ صوبہ بلوچستان کے پسماندہ علاقوں کی ترقی اور سیلاب سے متاثرہ علاقوں میں بحالی کے لئے ہر ممکن اقدامات اٹھائے جائیں گے۔
