اسلام آباد ۔ 3 اکتوبر (اے پی پی) وزیراعظم عمران خان نے کہا ہے کہ کرپشن نے ہمارے نظام کو تباہی کے دھانے پر پہنچا دیا، اس ناسور سے ملک کو نجات دلانا میرا مشن ہے، صنعتکار ملکی معیشت میں اہم ترین کردار ادا کرتے ہیں، حکومت کاروبار میں آسانیاں پیدا کرے گی۔ ان خیالات کا اظہار انہوں نے معروف صنعتکاروں اور کاروباری شخصیات کے وفد سے گفتگو کرتے ہوئے کیا جس نے جمعرات کو یہاں ان سے ملاقات کی۔ وزیراعظم سے ملاقات کرنے والے وفد میں میاں منشا، بشیر علی محمّد، خلیل ستار، خالد محمود، شاہد عبداللہ، عارف حبیب، مصدق ذوالقرنین، عثمان خالد وحید، سکندر مصطفیٰ، خاور انور خواجہ، علی حبیب اور جاوید آفریدی شامل تھے۔ اس موقع پر وفاقی وزراءحماد اظہر، سید علی زیدی، مخدوم خسرو بختیار، مشیر خزانہ ڈاکٹر عبدالحفیظ شیخ، مشیر تجارت عبدالرزاق داو¿د، ڈاکٹر عشرت حسین، چیئرمین ایف بی آر سید شبرزیدی اور سینئر افسران موجود تھے۔ ملاقات میں ٹیکس امور، ڈیوٹیز اور برآمدات بڑھانے کے حوالے سے تجاویز پیش کی گئیں۔ وفد نے وزیر اعظم کو اقوام متحدہ میں مظلوم کشمیریوں کی آواز موثر طور پر بلند کرنے پر مبارکباد پیش کی۔ اس موقع پر وزیراعظم نے کہا کہ کاروباری طبقے سے میری ملاقاتوں کا سلسلہ جاری ہے۔
