اسلام آباد ۔ 5 نومبر (اے پی پی) وزیراعظم عمران خان نے کہا ہے کہ ملک کے معاشی حالات بہتری کی طرف گامزن ہیں، سرمایہ کار مختلف شعبوں میں دلچسپی لے رہے ہیں، روپے کی قدر بہتر ہو رہی ہے، برآمدات بڑھ رہی ہیں، نیا پاکستان پرانے اور روایتی طریقوں سے نہیں چلایا جا سکتا، نوجوانوں کیلئے روزگار کے مواقع پیدا کرنا اور غربت کا خاتمہ ہمارا مشن ہے، سی پیک گیم چینجر ثابت ہو گا، سول سرونٹس کی مشکلات دور کرنے اور سول سروس کو ماضی کی طرح فعال بنانے کیلئے تمام ممکنہ اقدامات اٹھائے جا رہے ہیں، سول سرونٹس عوامی فلاح و بہبود اور ترقی کیلئے محنت کریں اور مسائل کا حل نکالیں، سول سروس ریفارمز کو جلد حتمی شکل دی جائے۔ ان خیالات کا اظہار انہوں نے منگل کو تمام وفاقی وازرتوں کے سیکرٹریز اور صوبائی چیف سیکرٹریز سے ملاقات میں گفتگو کرتے ہوئے کیا۔ اجلاس میں مشیر برائے ادارہ جاتی اصلاحات ڈاکٹر عشرت حسین، مشیر برائے اسٹیبلشمنٹ شہزاد ارباب اور معاون خصوصی شہزاد اکبر بھی موجود تھے۔ سیکرٹریز نے ادارہ جاتی کارکردگی کو بہتر بنانے کےلئے تجاویز پیش کیں۔وزیر اعظم عمران خان نے اس موقع پر گفتگو کرتے ہوئے کہا کہ میں نے حکومت سنبھالتے ہی آپ سے ملاقات کی تھی جس کا مقصد حکومت کے اصلاحاتی ایجنڈے اور وژن کو عملی جامہ پہنانے کے سلسلہ میں ایک لائحہ عمل تشکیل دینا تھا، ملاقاتوں کا یہ تسلسل جاری رہے گا۔ وزیراعظم نے کہا کہ اس وقت ملک کے معاشی حالات بہتری کی طرف جا رہے ہیں، سرمایہ کار مختلف شعبوں میں دلچسپی کا اظہار کر رہے ہیں، روپے کی قدر بہتر ہو رہی ہے، برآمدات بڑھ رہی ہیں، سرمایہ کاروں کی جانب سے حکومتی پالیسیوں اور اب تک اٹھائے جانے والے اقدامات پر اعتماد نہایت حوصلہ افزاءہے، اس تبدیلی کا اعتراف بین الاقوامی اداروں کی جانب سے بھی کیا گیا ہے، اس فضاءکو مزید بہتر کرنے کی ضرورت ہے۔ انہوں نے کہا کہ پی ٹی آئی حکومت کا سب سے بڑا چیلنج اسٹیٹس کو تبدیل کرنا ہے، نیا پاکستان پرانے اور روایتی طریقوں سے نہیں چلایا جا سکتا، تبدیلی کے خواب کو عملی جامہ پہنانے کےلئے روایتی طریقوں کو خیرباد کہہ کر عوام کی فلاح کو مقدم رکھنا ہو گا۔ انہوں نے کہا کہ نوجوان طبقہ کےلئے روزگار کے مواقع پیدا کرنا اور غربت کا خاتمہ ہمارا مشن ہے۔ وزیراعظم نے کہا کہ پاکستان میں سیاحت کے بے پناہ مواقع موجود ہیں جو ملک کی معاشی و سماجی ترقی میں اہم کردار ادا کر سکتے ہیں، ان مواقع سے مکمل طور پر استفادہ کرنے کی ضرورت ہے۔ انہوں نے کہا کہ سی پیک پاکستان کےلئے گیم چینجر ثابت ہو گا، سی پیک منصوبوں سے پاکستان میں ترقی کا ایک نیا باب روشن ہو گا۔ انہوں نے کہا کہ حکومت کو سول سرونٹس کی مشکلات کا اندازہ ہے، ان مشکلات کو دور کرنے اور سول سروس کو ماضی کی طرح فعال بنانے کےلئے تمام ممکنہ اقدامات اٹھائے جا رہے ہیں۔ انہوں نے کہا کہ سیکرٹریز کی تعیناتی کی مدت کی پالیسی وضع کر دی گئی تاکہ آپ دلجمعی اور یکسو ئی سے اپنے اپنے متعلقہ محکموں میں اپنی خدمات سرانجام دے سکیں، قابل، پرعزم اور محنتی سول سروس حکومت کے وژن کو عملی شکل دینے میں کلیدی کردار ادا کرتی ہے۔ انہوں نے کہا کہ آپ عوامی فلاح و بہبود اور ترقی کےلئے محنت کریں اور مسائل کا حل نکالیں، ترقی تب ہی ممکن ہے جب صحیح اور بروقت فیصلے لئے جائیں۔ انہوں نے کہا کہ ایک ایسی حکومت کے دور میں جو سرکاری ملازمین پرکسی قسم کا سیاسی دباو¿ نہ ڈالنے پر یقین رکھتی ہے وہاں آپ کےلئے اپنی بھرپور صلاحیتوں کو بروئے کار لانے اور قوم کی خدمت کرنے کا بہترین موقع ہے۔ انہوں نے کہا کہ گورننس میں شفافیت اور جدت لانے کےلئے ٹیکنالوجی کو بروئے کار لایا جائے۔ مشیر برائے ادارہ جاتی اصلاحات نے سول سروس ریفارمز کے حوالہ سے بھی اجلاس کو بریف کیا۔ وزیرِاعظم نے ہدایت کی کہ ان سفارشات کو حتمی شکل دینے کا عمل جلد مکمل کیا جائے تاکہ سول سروس کی کارکردگی میں بہتری لائی جا سکے۔
