پشاور۔14 مارچ (اے پی پی) وفاقی وزیر دفاع پرویز خان خٹک نے کہا ہے کہ وزیراعظم عمران خان کی ہدایت پر ملک میں ہیلتھ ایمرجنسی نافذ کی گئی ہے، کرونا وائرس سے نمٹنے کیلئے عوام احتیاطی تدابیر اختیار کریں تاکہ اس وباء سے بچا جاسکے ،حکومت پوری طرح متحرک ہے تاکہ اس وباء کو ملک میں پھیلنے سے بچایا جائے، تمام انتظامات کا وزیر اعظم خود جائز ہ لے رہے ہیں، قومی سلامتی اجلاس میں اہم فیصلے ہوئے ہے، پاکستان میںیہ وباء ابھی قابو میں ہے تاہم وفاق سمیت صوبوں کو اپنی ذمہ داریاں پورنی کرنی ہوں گی، یہ کام صرف حکومت اور اتحادی جماعتوں کا نہیں اپوزیشن پر بھی یکساں ذمہ داری عائد ہوتی ہے، وزیر اعظم عمران خان نے عوام کی محرومیاں دور کرنے پر خصوصی توجہ دی، جاپان کی حکومت کے تعاون سے جیکا پروگرام اور ایشین ڈیولپمنٹ بنک کے تعاون سے چار اروب روپے کے سڑکوں کی تعمیرات کا کام جاری ہے جو جون تک مکمل ہوجائے گا۔وہ نوشہر ہ کلاں شہید آباد کو سوئی گیس کی فراہمی کے منصوبے کے افتتاح تقریب سے خطاب اور سابق تحصیل کونسلر ریاض علی خان کے بھانجے کے وفات اور سابق ویلج ناظم سید علی خان کی والدہ کی وفات پر اظہار تعزیت کے بعد میڈیا سے بات چیت کررہے تھے۔ اس موقع پر صوبائی وزیر آبپاشی لیاقت خان خٹک ،قومی اسمبلی میں مجلس قائمہ برائے توانائی وقدرتی وسائل کے چیرمین ڈاکٹر عمران خٹک سابق ضلعی کونسلر اسحاق خٹک ،سابق تحصیل ناظم احد خٹک اور سابق ضلعی کونسلر حاضٰ نوشیر اور سابق ویلج ناظم حاجی اعجاز نے بھی خطاب کیا۔ پرویز خٹک نے کہا کہ خیبر پختونخوا ،پنجاب اور بلوچستان کی حکومت نے کروناوائرس کو روکنے کیلئے اچھے اقدامات کیے ہے سندھ کو بھی چاہیے کہ اپنے صوبے میں اس وائرس کو پھیلنے سے روکے اور ہنگامی بنیادوں پر اقدامات اٹھائے۔ انہوں نے کہا کہ وہ اللہ تعالی سے دعا کریں کہ پاکستان اور امت مسلمہ اس وائرس سے محفوظ رہے ۔ پرویز خان خٹک نے کہا کہ ضلع بھر میں سوئی گیس اور بجلی کے منصوبوں پر تیزی سے کام جاری ہے اور ضلع نوشہرہ پاکستان کا واحد ضلع ہوگا جہاں کونے کونے گلی کوچے تک سوئی گیس اور بجلی پہنچائیں گے،ملک معاشی طور پر عمران خان کی قیادت میں ترقی کی جانب رواں دواں ہے اور انشااللہ پانچ سال بعد عمران خان کی قیادت میں اس خطے میں پاکستان کا نقشہ تبدیل ہو کر ایک نیا پاکستان بن کر ابھرے گا ، قوم کے تما م مسائل جس کا ہم سوچ بھی نہیں سکتے وہ حل ہو جائیں گے۔ انہوں نے کہا کہ سابق حکمرانوں نے لوٹ مار کر کے ملک کا بیڑا غرق کر دیا تھا، ہم سابق کرپٹ حکمرانوں کو بتانا چاہتے ہیں کہ عوام نے ہمیشہ کیلئے آپ کی سیاست دفن کر دی ہے اب ملک میں میرٹ کی بالا دستی قائم ہو گی۔ انہوں نے کہا کہ موجودہ حکومت سابق کرپٹ حکمرانوں سے ایک ایک پائی کا حساب لے گی اور عوام کی فلاح و بہود پر خرچ کریں گی، وزیراعلی محمود خان نے فنڈز جاری کرنے کا سلسلہ شروع کردیا ہے اور اب صوبے میں ترقی کادور دورہ شروع ہوگا۔ انہوں نے نوجوانوں پر زور دیا کہ انے والا دورتعلیم کا ہے، موجودہ حکومت انصاف اور میرٹ کی پالیسی پر گامزن ہے۔ پرویز خٹک نے کہا کہ میں نے اپنے پانچ سالہ دور میں میرٹ پر بھرتیاں کی ان تمام اداروں میں اب تبدیلی آچکی ہے اور میرٹ اور انصاف پر بھرتی ہونے والے نوجوانوں نے ترقی کا نیا دور شروع کردیا ہے۔