دوحہ۔24اگست (اے پی پی):وزیراعظم محمد شہباز شریف اور قطر کے امیر شیخ تمیم بن حمد الثانی نے پاکستان قطر دو طرفہ تعلقات پر اطمینان کا اظہار کرتے ہوئے باہمی دلچسپی کے تمام شعبوں میں دوطرفہ تعاون کو مزید مستحکم کرنے کیلئے مل کر کام کرنے پر اتفاق کیا۔ دونوں رہنمائوں کے درمیان دوحہ میں دیوان امیری میں ملاقات ہوئی۔ وزیراعظم کے ہمراہ کابینہ کے وزراء اور سینئر ارکان سمیت اعلیٰ سطح کا وفد بھی تھا۔ دیوان امیری پہنچنے پر وزیر اعظم کا استقبال امیر قطر نے کیا ۔وزیراعظم کو گارڈ آف آنر پیش کیا گیا۔
اس کے بعد دونوں رہنمائوں نے وفود کی سطح پر مشاورت کی، جس کے بعد امیر کی طرف سے وزیر اعظم اور ان کے وفد کے اعزاز میں ظہرانے کی ضیافت دی گئی۔ اپنی وسیع مشاورت کے دوران دونوں رہنمائوں نے دوطرفہ، علاقائی اور بین الاقوامی امور پر تبادلہ خیال کیا۔ انہوں نے پاکستان قطر دو طرفہ تعلقات پر اطمینان کا اظہار کیا اور باہمی دلچسپی کے تمام شعبوں میں دوطرفہ تعاون کو مزید مستحکم کرنے کیلئے مل کر کام کرنے پر اتفاق کیا۔ دونوں فریقوں نے باہمی تجارت کو بڑھانے کیلئے ادارہ جاتی روابط کو مضبوط بنانے پر اتفاق کیا۔
مزید برآں زراعت ،خوراک ، توانائی کے شعبوں میں تعاون بڑھانے اور پاکستان میں قابل تجدید توانائی، سیاحت اور مہمان نوازی کے شعبوں میں قطر کی سرمایہ کاری کی حوصلہ افزائی پر اتفاق کیا گیا ۔ قطر میں کام کرنے میں دلچسپی رکھنے والے پاکستانیوں کو مزید مواقع فراہم کرنے اور دفاع، ایوی ایشن اور میری ٹائم کے شعبوں میں تعاون کو وسعت دینے پر بھی بات چیت کی گئی ۔ قطر کی شاندار اقتصادی ترقی کو سراہتے ہوئے وزیراعظم نے قطری قیادت کی بصیرت کو سراہا اور مستقبل میں قطری عوام کیلئے مزید کامیابیوں کی خواہش کا اظہار کیا ۔
ایل این جی تعاون کے شعبے میں قطر کے ساتھ پاکستان کی طویل المدتی شراکت داری کا ذکر کرتے ہوئے وزیراعظم نے پاکستان کی توانائی کی ضروریات کو پورا کرنے میں قطر کے اہم تعاون پر عزت مآب امیر کا شکریہ ادا کیا۔ دونوں فریقین نے توانائی کے شعبے میں باہمی فائدہ مند تعاون کیلئے نئی راہیں بھی تلاش کرنے پر اتفاق کیا۔ وزیراعظم نے کہا کہ قطر میں کام کرنے والے اور مقیم پاکستانی نہ صرف دونوں ممالک کی اقتصادی ترقی کیلئے تقویت کا باعث ہیں بلکہ عوام سے عوام کے روابط کی اہمیت کا بھی ثبوت ہیں۔
انہوں نے امید ظاہر کی کہ قطر کی تیز رفتار اقتصادی ترقی مستقبل میں پاکستانیوں کیلئے مزید مواقع فراہم کرے گی۔ وزیر اعظم نے قطر کی حکومت کی جانب سے فیفا ورلڈ کپ 2022 کی میزبانی کیلئے کیے گئے وسیع انتظامات کو سراہا۔ انھوں نے قطری قیادت کو میگا ایونٹ کے کامیاب انعقاد کیلئے پاکستان کی حمایت کا یقین دلایا۔ وزیراعظم اور امیر نے خطے میں ہونے والی پیش رفت پر بھی تبادلہ خیال کیا۔ وزیراعظم نے افغانستان میں امن اور مفاہمت کے فروغ کیلئے قطر کی دیرینہ اور مسلسل کوششوں کو سراہا۔
دونوں رہنمائوں نے افغان عوام کو درپیش سنگین انسانی اور معاشی بحرانوں سے نمٹنے میں مدد کیلئے مل کر کام کرنے پر اتفاق کیا۔ وزیراعظم نے بھارتی غیر قانونی طور پر مقبوضہ جموں و کشمیر میں انسانی حقوق کی سنگین صورتحال کا ذکر کرتے ہوئےجنوبی ایشیا میں پائیدار امن، سلامتی اور خوشحالی کیلئے جموں و کشمیر کے تنازع کے پرامن حل کی اہمیت پر زور دیا۔ عزت مآب امیر نے وزیر اعظم کو عہدہ سنبھالنے پر مبارکباد دی اور ان کی مکمل کامیابی کی خواہش کی۔ انہوں نے پاکستان کے عوام کی مسلسل ترقی اور خوشحالی کیلئے نیک خواہشات کا اظہار بھی کیا۔
امیر نے قطر کے وزیراعظم کو پاکستان کے ساتھ مضبوط اقتصادی شراکت داری قائم کرنے کے عزم کا اعادہ کیا۔ وزیراعظم نے قطر انوسٹمنٹ اتھارٹی کی پاکستان میں مختلف تجارتی اور سرمایہ کاری کے شعبوں میں 3 بلین امریکی ڈالر کی سرمایہ کاری کی تیاری پر امیر قطر کا شکریہ ادا کیا۔
اس موقع پر امیر نے قطر کی ترقی میں پاکستانیوں کے اہم کردار کو سراہا اور قطر ویژن 2030 کے مطابق پاکستانیوں کیلئے روزگار کے بہتر مواقع فراہم کرنے کے قطر کے عزم کا اظہار کیا۔ دونوں رہنمائوں نے دوطرفہ تعاون میں موجودہ رفتار کو برقرار رکھنے کیلئے متواتر اعلیٰ سطحی تبادلوں کی اہمیت پر اتفاق کیا۔
وزیراعظم نے امیر قطر کو جلد از جلد پاکستان کا دورہ کرنے کی دعوت دی۔ پاکستان اور قطر کے درمیان دیرینہ، برادرانہ تعلقات ہیں جو مشترکہ عقیدہ ، باہمی اعتماد اور قریبی تعاون پر مبنی ہیں۔ اپریل 2022 میں عہدہ سنبھالنے کے بعد وزیر اعظم محمد شہباز شریف کا قطر کا یہ پہلا دورہ ہے۔
Short Link: https://urdu.app.com.pk/urdu/?p=323575
