باکو ۔24فروری (اے پی پی):وزیراعظم محمد شہباز شریف نےصدر الہام علیوف کی دعوت پر 24 سے 25 فروری تک آذربائیجان کا سرکاری دورہ کیا۔دورے کے دوران پاکستان اور آذربائیجان کے درمیان گہرے، تاریخی اور برادرانہ تعلقات پر زور دیا گیا اور دوطرفہ تعلقات کو مزید مضبوط بنانے کے لیے دونوں ممالک کی قیادت کے عزم کا اعادہ کیاگیا۔ پیر کو دفتر خارجہ سے جاری اعلامیے کے مطابق 24 فروری کو صدر الہام علیوف نے زگلبا پیلس میں وزیر اعظم کا استقبال کیا۔
اپنی تفصیلی بات چیت کے دوران، دونوں فریقوں نے باہمی دلچسپی کے شعبوں اور دو طرفہ تعاون پر تبادلہ خیال کیا اور متعدد شعبوں میں تعاون کو مزید فروغ دینے کی خواہش کا اظہار کیا۔ آذربائیجان کے صدر نے مختلف اہم معاہدوں پر دستخط کے لیے وزیراعظم کی اپریل 2025 میں دورہ پاکستان کی دعوت قبول کی۔ دونوں رہنماؤں نے دونوں ممالک کے درمیان سٹریٹجک شراکت داری کے عزم کا اعادہ کیا اور مضبوط دوستی کی مستحکم ترقی اور استحکام پر اطمینان کا اظہار کیا۔
انہوں نے دوطرفہ تجارت اور سرمایہ کاری کو مزید بڑھانے اور توانائی، انفراسٹرکچر، سرمایہ کاری اور رابطے کے شعبوں میں مشترکہ سرمایہ کاری کے منصوبوں کی تلاش کی اہمیت پر بھی زور دیا۔ وزیر اعظم نے جمہوریہ آذربائیجان کی ایکسپورٹ اینڈ انویسٹمنٹ پروموشن ایجنسی کے تعاون سے منعقدہ بزنس فورم میں شرکت کی۔ وزیراعظم نے ترجیحی تجارتی معاہدے (پی ٹی اے) اور ٹرانزٹ ٹریڈ ایگریمنٹ (ٹی ٹی اے) کے نفاذ پر روشنی ڈالی اور یہ بھی بتایا کہ پاکستان میں آذربائیجان-پاکستان چیمبر آف کامرس اینڈ انڈسٹری کا افتتاح 12 فروری 2025 کو کیا گیا ہے۔
دونوں رہنماؤں نے کثیرالجہتی فورمز بالخصوص اقوام متحدہ اور او آئی سی پر دونوں ممالک کے درمیان فعال تعاون پر اطمینان کا اظہار کیا۔ وزیراعظم شہباز شریف نے بھارتی زیر تسلط جموں و کشمیر کے مسئلہ پر آذربائیجان کے مسلسل اصولی موقف اور کشمیری عوام کے حق خودارادیت کی حمایت کی تعریف کی، جیسا کہ اقوام متحدہ کی سلامتی کونسل کی متعلقہ قراردادوں میں درج ہے۔
وزیراعظم محمد شہباز شریف اور صدر الہام علیوف نے دونوں ممالک کے درمیان مختلف شعبوں میں تعاون کو فروغ دینے کے لیے مختلف معاہدوں اور مفاہمت کی یادداشتوں پر دستخط کی تقریب میں شرکت کی۔وزیر اعظم محمد شہباز شریف نے باکو میں نگورنوقاراباخ کی آزادی کیلئے جنگ کے ہیروز اور شہداء کو خراج عقیدت پیش کرنے کے لیے "یادگارِ فتح” کا دورہ کیا۔
انہوں نے جنوبی قفقاز میں امن اور استحکام کے فروغ کے لیے آذربائیجان کی کوششوں کے لیے پاکستان کی غیر متزلزل حمایت کا اعادہ کیا۔ دورے کے دوران پاکستان اور آذربائیجان کے درمیان گہرے، تاریخی اور برادرانہ تعلقات پر زور دیاگیااور دوطرفہ تعلقات کو مزید مضبوط بنانے کے لیے دونوں ممالک کی قیادت کے عزم کا اعادہ کیاگیا۔
Short Link: https://urdu.app.com.pk/urdu/?p=565740
