اسلام آباد۔13مئی (اے پی پی):وزیراعظم محمد شہباز شریف نے زیر تعمیر دانش سکولوں اور دانش یونیورسٹی پر کام تیز تر کرنے ،ان کی اعلیٰ معیار کی تعمیر ،تھرڈ پارٹی ویلیڈیشن اور دانش اتھارٹی کے قیام کے حوالے سے تجاویز پیش کرنے کی ہدایت کی ہے۔
منگل کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف کی زیر صدارت دانش سکولز و یونیورسٹی کی حوالے سے جائزہ اجلاس منعقد ہوا۔ اجلاس میں ملک بھر میں 15 نئے دانش سکولز کی تعمیر کی پیشرفت کا جائزہ لیا گیا۔ اجلاس کو ملک کے مختلف علاقوں میں زیر تعمیر دانش سکولز اور دانش یونیورسٹی ، اسلام آباد کے حوالے سے بریفنگ دی گئی۔ بریفنگ کے دوران بتایا گیا کہ دانش سکول، اسلام آباد کا 41 فیصد کام مکمل کر لیا گیا ہے، اسے دسمبر 2025 میں مکمل کر لیا جائے گا ۔ بریفنگ میں بتایا گیا کہ گلگت بلتستان میں دانش سکول ، سلطان آباد، گانچھے اور استور کو 30 جون 2026 تک مکمل کر لیا جائے گا ، بھمبر اور باغ کے دانش سکولز جون 2026 میں مکمل ہوں گے ، شاردہ، ، سبی، موسیٰ خیل اور ژوب کے دانش سکولوں کی فزیبلٹی اور ڈیزائن مکمل ہو چکا ہے ، حب، کراچی اور چترال کے دانش سکولوں کے حوالے سے زمین کے حصول کی حوالے سے کام کیا جا رہا ہے ، وفاقی کابینہ کی منظوری سے دانش یونیورسٹی کے حوالے سے زمین مختص کی جا چکی ہے ۔
اجلاس نے یونیورسٹی کی فزیبلٹی ، ڈیزائن کی پری کوالیفکیشن کے لئے ماہر کنسلٹنٹ کی تعیناتی کا عمل شروع کرنے کی منظوری دے دی ۔ وزیراعظم نے زیر تعمیر دانش سکولوں اور دانش یونیورسٹی پر کام تیز تر کرنے کی ہدایت کی۔ انہوں نے دانش سکولز اور یونیورسٹی کی اعلیٰ معیار کی تعمیر اور تھرڈ پارٹی ویلیڈیشن کی بھی ہدایت کی۔ وزیراعظم نے کہا کہ دانش سکولز اور یونیورسٹی ملک کے مستحق لائق طلباء کو اعلیٰ معیار کی تعلیم کی فراہمی کے حوالے سے حکومت کے ترجیحی منصوبے ہیں ۔ انہوں نے دانش سکولز کے تمام کلاس رومز میں سمارٹ بورڈ کی تنصیب اور ہر دانش سکول میں ڈیجیٹل لائبریری بنانے کی ہدایت کی۔ انہوں نے ہدایت کی کہ دانش سکول میں اساتذہ کی تعیناتی کا عمل میرٹ پر مبنی اور انتہائی شفاف ہونا چاہئے، جس علاقے میں دانش تعمیر ہو رہا ہے وہاں کے مقامی اساتذہ کو ترجیح دی جائے ۔ وزیراعظم نے دانش اتھارٹی کے قیام کے حوالے سے تجاویز پیش کرنے کی بھی ہدایت کی۔ اجلاس میں وفاقی وزیر منصوبہ بندی احسن اقبال، وفاقی وزیر تعلیم ڈاکٹر خالد مقبول صدیقی ، وفاقی وزیر اقتصادی امور احد خان چیمہ، چاروں صوبوں، گلگت بلتستان ، آزاد جموں و کشمیر کے چیف سیکرٹریز ، اسلام آباد کیپٹل ٹیریٹری کے چیف کمشنر اور دیگر متعلقہ اعلیٰ سرکاری افسران نے شرکت کی۔
Short Link: https://urdu.app.com.pk/urdu/?p=596569
