اسلام آباد۔20مئی (اے پی پی):وزیراعظم محمد شہباز شریف نے چیف آف آرمی سٹاف سید عاصم منیر کو فیلڈ مارشل کے عہدے پر ترقی ملنے پر دلی مبارکباد دیتے ہوئے کہا ہے کہ معرکہ حق کے دوران آرمی چیف سے لے کر ہر سپاہی نے دفاع وطن کیلئے دلیری سے اپنی خدمات سر انجام دیں اور سرحدوں پر دشمن کی جارحیت کا منہ توڑ جواب دیا۔
منگل کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف نے کہا کہ آرمی چیف نے معرکہ حق کے دوران آپریشن بنیان مرصوص میں اپنی قائدانہ اور پیشہ وارانہ صلاحیتوں سے دشمن کے ناپاک عزائم کو خاک میں ملایا۔جنرل سید عاصم منیر کو اللہ تعالیٰ نے بے مثال خوبیوں سے نوازا ہے، آپریشن بنیان مرصوص کی کامیابی میں ان کی دلیری، استقامت اور دانشمندی کا کلیدی کردار تھا۔
انہوں نے کہا کہ آرمی چیف کی دفاع وطن کیلئے گراں قدر خدمات اور آپریشن بنیان مرصوص کے ذریعے خطے میں طاقت کے توازن کو قائم کرنے کیلئے اقدامات پر انہیں فیلڈ مارشل کے عہدے پر ترقی دی گئی۔انہوں نے کہا کہ معرکہ حق کے دوران آرمی چیف سے لے کر سرحدوں پر دشمن کی جارحیت کا منہ توڑ جواب دینے والے ہر سپاہی نے دفاع وطن کیلئے دلیری سے اپنی خدمات سر انجام دیں،مجھ سمیت پوری قوم کو فیلڈ مارشل سید عاصم منیر اور ان کی قیادت میں اپنی بہادر افواج کے غازیان و شہداء اور ان کے اہلخانہ پر فخر ہے۔
Short Link: https://urdu.app.com.pk/urdu/?p=599361
