واہ۔ 06 فروری (اے پی پی) وزیراعظم محمد نواز شریف نے پیر کو پاکستان آرڈننس فیکٹری میں براس مل کی اپ گریڈیشن کا افتتاح کردیا ۔ اپ گریڈیشن کے بعد پی او ایف کی براس مل جنوبی ایشیاءمیں اپنی نوعیت کی سب سے بڑی مل بن گئی ہے اور اس کا شمار براس کی پیداوار کی نامور کمپنیوں میں ہوتا ہے۔وزیراعظم نے چیف آف آرمی سٹاف جنرل قمر جاوید باجوہ کے ہمراہ واہ براس مل کے مختلف حصوں کا دورہ کیا۔براس مل کی پیداواری استعداد اب 8ہزار میٹرک ٹن سے بڑھ کر 24ہزار میٹرک ٹن ہوگئی ہے۔اس موقع پر وزیراعظم کو مل کے بارے میں بریفننگ دی گئی جو 1954ءمیں قائم کی گئی تھی۔ وزیراعظم کو بتایا گیا کہ یہ مل ملک کی دفاعی ضروریات احسن انداز میں پورا کررہی ہے اور اضافی مصنوعات برآمد بھی کررہی ہے انہیں بتایا گیا کہ جدید ترین مل کے امور کار کی نگرانی باصلاحیت پروفیشنلز کی ٹیم کررہی ہے۔ انہوں نے امید ظاہر کی کہ یہ ٹیم اپنی کاوشیں جاری رکھے گی اور پاکستان کی اقتصادی ترقی میں اہم کردار ادا کرے گی۔ وزیراعظم نے پی او ایف کی مصنوعات کے معیار اور افرادی قوت کے جذبے کو بھی سراہا۔وزیراعظم نے وزیر داخلہ چوہدری نثار علی خان کی سفارش پرپی او ایف کے عملے کےلئے 25فیصد الاﺅنس اوردو سالانہ انکریمنٹ کا بھی اعلان کیا۔وزیر داخلہ چوہدری نثار علی خان اور وزیر دفاعی پیداوار رانا تنویر حسین بھی وزیراعظم کے ہمراہ تھے۔
