وزیراعظم محمد نواز شریف کی ترکمانستان کے صدر قربان علی بردی محمدوف سے ملاقات
دونوں ممالک نے تاپی گیس پائپ لائن اور پاکستان اور ترکمانستان کے درمیان فضائی روابط دوبارہ قائم کرنے کا جائزہ لیا
چائنہ پاکستان اکنامک کوریڈور سے پاکستان اور پورے خطہ میں ترقی و خوشحالی کے ایک نئے دور کا آغاز ہو گا،وزیراعظم محمد نواز شریف
صدر قربان علی بردی محمدوف نے پاکستان کی معیشت کو مضبوط اور عوام کی ترقی کو یقینی بنانے کیلئے وزیراعظم نواز شریف کے جرات مندانہ اقدامات کے وژن کو سراہا
اشک آباد ۔ 25 نومبر (اے پی پی) وزیراعظم محمد نواز شریف نے ترکمانستان کے صدر قربان علی بردی محمدوف سے ملاقات کی اور باہمی دلچسپی پر تبادلہ خیال کیا۔ دونوں ممالک نے تاپی گیس پائپ لائن اور پاکستان اور ترکمانستان کے درمیان فضائی روابط دوبارہ قائم کرنے کا جائزہ لیا۔ وزیراعظم ہاﺅس کے بیان کے مطابق وزیراعظم محمد نواز شریف نے کہا کہ چائنہ پاکستان اکنامک کوریڈور سے پاکستان اور پورے خطہ میں ترقی و خوشحالی کے ایک نئے دور کا آغاز ہو گا۔ انہوں نے کہا کہ خطہ کی آبادی کا مستقبل کوریڈور سے منسلک ہے اور اگر کوئی ملک اس بڑے پراجیکٹ میں شامل ہونے میں دلچسپی رکھتا ہے تو پاکستان اس کا خیرمقدم کرے گا۔ نواز شریف نے کہا کہ ترکمانستان، افغانستان، پاکستان اور بھارت (تاپی) ایک اہم منصوبہ ہے جس سے رکن ممالک کی توانائی کی ضروریات پوری کرنے میں مدد ملے گی۔ انہوں نے کہا کہ پاکستان اور ترکمانستان کے درمیان دوطرفہ تعلقات ہر آنے والے دن میں مضبوط ہو رہے ہیں۔ انہوں نے ہر سال اسلام آباد اور اشک آباد میں ایک اعلیٰ سطحی اجلاس کے انعقاد کی تجویز دی۔
