اسلام آباد۔26اگست (اے پی پی):وزیراعظم محمد شہباز شریف نے دریائے ستلج میں سیلابی صورتحال کے پیش نظر متاثرہ علاقوں میں پھنسے ہوئے افراد کے انخلااور انہیں محفوظ مقامات پر پہنچانے کے لئے فوری اقدامات اٹھانے کی ہدایت کی ہے۔منگل کو وزیراعظم آفس کے میڈیا ونگ سے جاری بیان کے مطابق وزیراعظم نے دریائے ستلج میں سیلابی صورتحال پر چیئر مین نیشنل ڈیزاسٹر مینجمنٹ اتھارٹی ( این ڈی ایم اے) کو ہدایات جاری کر دی ہیں ۔
وزیراعظم نے ہدایت کی کہ دریائے ستلج سے پنجاب کے متاثرہ اضلاع میں ریسکیو آپریشنز تیز کئے جائیں، سیلاب سے متاثرہ علاقوں میں پھنسے ہوئے افراد کے انخلا اور انہیں محفوظ مقامات پر پہنچانے کے لئے فوری اقدامات کئے جائیں،دریائے ستلج میں گنڈا سنگھ والا کے مقام پر سیلابی صورتحال کے پیش نظر حفاظتی اقدامات اور نگرانی تیز کی جائے، خوراک، ادویات اور خیموں کی فراہمی کو یقینی بنایا جائے۔وزیراعظم نے چیئر مین این ڈی ایم اے کو پنجاب کے ڈیزاسٹر مینجمنٹ کے ادارے سے مکمل رابطے میں رہنے کی بھی ہدایت کی ہے۔
