اسلام آباد ۔ 30 اگست (اے پی پی) وزیراعظم محمد نواز شریف نے کہا ہے کہ ملک میں لوڈ شیڈنگ کا ہمیشہ ہمیشہ کیلئے خاتمہ کر دیا جائے گا، بجلی کے جاری منصوبوں کی تکمیل سے نیشنل گرڈ میں وافر مقدار میں بجلی شامل کی جائے گی۔ ان خیالات کا اظہار انہوں نے منگل کو وزیراعظم ہاﺅس میں کابینہ کمیٹی برائے توانائی کے اجلاس کی صدارت کرتے ہوئے کیا۔ اجلاس میں پانی و بجلی کے وفاقی سیکرٹری یونس ڈھاگہ نے ملک میں بجلی کے جاری منصوبوں کی مدت تکمیل کے بارے میں بریفنگ دی۔ وزیراعظم کو بتایا گیا کہ بجلی کے جاری منصوبوں کو مارچ 2018ءتک مکمل کر لیا جائے گا۔ وزیراعظم ہاﺅس سے جاری کئے گئے ایک بیان میں بتایا گیا کہ مقررہ مدت میں تھری ایل این جی پاور پلانٹ (بھیکھی)، حویلی بہادر، بلوکی 3600 میگاواٹ، چشمہ تھری و فور نیوکلیئر (340) میگاواٹ فی منصوبہ، گدو گیس 400 میگاواٹ پلس، نندی پور گیس 100 میگاواٹ پلس، ساہیوال کول (1320) میگاواٹ، متعدد ونڈ بگاس (350) میگاواٹ، پترنڈ ایچ بی پی ہائیڈل (147) میگاواٹ، فیصل آباد گیس (250) میگاواٹ، نیلم جہلم (969) میگاواٹ اور تربیلا توسیع چار (1410) میگاواٹ اور پورٹ قاسم پاور پلانٹ (1320) میگاواٹ ان منصوبوں میں شامل ہیں۔ اجلاس میں بتایا گیا کہ مارچ 2018ءتک مجموعی طور پر 11 ہزار 131 میگاواٹ بجلی نیشنل گرڈ میں شامل کی جائے گی۔ اجلاس کو یہ بھی بتایا گیا کہ تمام جاری منصوبوں کے مطابق ٹرانسمیشن لائن کے منصوبے آن ٹریک ہیں، ان منصوبوں پر بھاری سرمایہ کاری کی گئی ہے، اضافی بجلی کی فراہمی سے ڈسٹری بیوشن نیٹ ورک بہتر انداز میں لوڈ شیڈنگ کے خاتمہ کیلئے بجلی کی تقسیم پر عملدرآمد کر سکے گا۔
