اسلام آباد ۔ 4 اکتوبر (اے پی پی) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیراعظم سے طالبان وفد کی کوئی ملاقات نہیں ہوئی، اس ضمن میں نشر اور شائع ہونے والی خبروں میں صداقت نہیں۔ جمعہ کو اپنے ٹویٹ میں انہوں نے کہاکہ طالبان پولیٹیکل کمیشن کے وفد کے ساتھ گزشتہ روز دفتر خارجہ میں مذاکرات کا انعقاد مفاہمتی عمل کے لئے نیک شگون ہے، یہ عمل اس امر کا ثبوت ہے کہ پاکستان نے ہمیشہ علاقائی اور عالمی امن کیلئے مثبت ماحول پیدا کرنے میں گراں قدر کردار ادا کیا ہے۔ انہوں نے کہاکہ گزشتہ روز طالبان وفد کی وزیر خارجہ سے ملاقات اسی سلسلہ کی کڑی تھی، پر امید ہیں کہ اس سے عنقریب مثبت نتائج حاصل ہوں گے۔
