اسلام آباد ۔ وزیراعظم کے ترجمان افتخار درانی نے کہا ہے کہ پارلیمان کی تعظیم اور کرپشن کیخلاف فیصلہ کن اقدامات دونوں حکومت کے ایجنڈے کے مرکزی نکات ہیں،پارلیمان کی ساکھ مجروح ہونے دیں گے نہ ہی کرپشن کے خاتمے پر کوئی سمجھوتہ کریں گے۔جمعہ کو ترجمان وزیر اعظم افتخار درانی نے چیئرمین سینٹ کی جانب سے وزیر اطلاعات کے ایوان میں داخلے پر پابندی کے معاملہ پر وضاحتی بیان میں کہا کہ چیئرمین سینٹ کی جانب سے وزیر اطلاعات کے ایوان میں داخلے پر پابندی غیرمعمولی اقدام تھا۔انہوں نے کہا کہ ایوان بالا میں جنم لینے والی صورتحال سے تشویش کی غیر معمولی لہر نے جنم لیا۔انہوں نے کہا کہ وزیراعظم عمران خان نے سینٹ میں پیدا ہونے والے بحران کے حل کی ذمہ داری وزیر دفاع پرویز خٹک کو سونپی،وزیر دفاع نے خوش اسلوبی سے معاملہ سلجھایا‘معاملے کے سلجھاو کے حکومتی موقف میں کوئی کوتاہی یا تضاد نہیں۔انہوں نے کہا کہ کرپشن اور موجودہ معاشی حالات کا گہرا تعلق ہے‘ پارلیمنٹ میں اس پر بات کرنا کسی کا استحقاق مجروح نہیں کرتا۔
