اسلام آباد ۔ 31 جنوری (اے پی پی) وزیراعظم کے معاون خصوصی برائے امور نوجوانان محمد عثمان ڈار سے انٹرنیشنل لیبر آرگنائزیشن (آئی ایل او) کے ساتھ باہمی تعاون کے ممکنہ مواقع تلاش کرنے کے لئے آئی ایل او کے تربیت اور ملازمت کے ماہر گبرائیل بورڈوڈو نے ملاقات کی جس میں نوجوانوں کو ملک کے اندراور بیرون ممالک میں بہتر ملازمتوں کی فراہمی کے امور زیر غور آئے ۔ملاقات میں اتفاق کیا گیا کہ انٹرنیشنل لیبر آرگنائزیشن نہ صرف وزیراعظم یوتھ پروگرام بھرپور معاونت کریگی بلکہ تربیتی معیار کو بہتربنانے اور اس شعبے کے لئے پالیسی تیاری میں بھی ساتھ دیگی ۔وزیراعظم کے معاون خصوصی برائے امور نوجوانان محمد عثمان ڈار نے بہتر ملازمتوں کی مہارت کی فراہمی ،نوجوانوں کی فلاح بہبود اور خوشحالی کے لئے وزیراعظم یوتھ پروگرام کے ساتھ ملکر کام کرنے کے انٹرنیشنل لیبر آرگنائزیشن(آئی ایل او ) کے عزم کی تعریف کی ۔
