وزیراعلیٰ مریم نواز سے وفاقی وزیر ریلوے حنیف عباسی کی ملاقات،سیاسی صورتحال، قومی سلامتی، پنجاب میں جدید ٹرانسپورٹ انفراسٹرکچر پر تبادلہ خیال

لاہور۔16مئی (اے پی پی):وزیراعلیٰ پنجاب مریم نواز سے وفاقی وزیر برائے ریلوے حنیف عباسی نے ملاقات کی۔ملاقات میں موجودہ سیاسی صورتحال، قومی سلامتی، ترقیاتی منصوبوں اور پنجاب میں جدید ٹرانسپورٹ انفراسٹرکچر پر تبادلہ خیال کیاگیا۔پنجاب کی پہلی بلٹ ٹرین اور ہائی سپیڈ ٹرین پراجیکٹس پر بھی تفصیلی بات چیت ہوئی۔

دونوں رہنماؤں نے آپریشن بنیان مرصوص کی کامیابی پر افواجِ پاکستان کو زبردست خراجِ تحسین پیش کیا۔وفاقی وزیر حنیف عباسی نے سی ایم لیپ ٹاپ اور ہونہار سکالرشپ فیز ٹو کی کامیابی کو سراہا۔وزیراعلیٰ نے گفتگو کرتے ہوئے کہا کہ آپریشن بنیان مرصوص قومی سلامتی کے تحفظ میں سیاسی و عسکری قیادت سمیت قوم کے مکمل اتحاد کا ثبوت ہے۔ پاک فوج کے جوانوں نے ہمیشہ جانوں کے نذرانے دے کر وطن عزیز کو محفوظ رکھا ہے۔

آج کا پاکستان مضبوط ہاتھوں میں ہے اور پوری قوم اپنی افواج اور اداروں کے ساتھ کھڑی ہے۔ ملک کو درپیش چیلنجز کا حل صرف سیاسی استحکام، قومی یکجہتی اور ترقیاتی تسلسل میں ہے۔ انہوں نے کہا کہ وقت آ گیا ہے کہ پنجاب کے عوام کو عالمی معیار کی سفری سہولیات فراہم کی جائیں۔بلٹ ٹرین اور جدید ریلوے نیٹ ورک سہولت سمیت معاشی سرگرمیوں اور روزگار کے نئے مواقع بھی پیدا کریں گے۔وفاقی وزیر نے کہاکہ مریم نواز کی قیادت میں پنجاب ایک بار پھر ترقی و خوشحالی کی راہ پر گامزن ہے۔

Short Link: https://urdu.app.com.pk/urdu/?p=597907