لاہور۔13مئی (اے پی پی):وزیراعلیٰ پنجاب مریم نواز شریف نے لاہور کے مختلف علاقوں کے اچانک دورے کئے۔وزیراعلی نے لاہور ڈویلپمنٹ پلان کے تحت مختلف زونزکا معائنہ کیا۔آپریشن بنیان مرصوص کی کامیابی پر عوام نے وزیراعلیٰ مریم نواز شریف کو مبارکبادپیش کی۔ مریم نواز نے مختلف پراجیکٹس کے دورے کئے اور تعمیراتی معیار کا جائزہ لیا۔انہوں نے نے زیر تعمیر روڈز،سٹریٹس اور نکاسی آب کے پراجیکٹس کا معائنہ کیا اور زیر تکمیل پراجیکٹس میں معیار کو یقینی بنانے کا حکم دیا۔
مریم نواز نے لاہور ڈویلپمنٹ پلان کی بر وقت تکمیل کی ہدایت بھی کی۔وزیراعلی نے مقامی شہریوں سے بات چیت کرتے ہوئے ترقیاتی منصوبوں کے بارے میں دریافت کیا۔شہریوں نے لاہور ڈویلپمنٹ پلان کے آغاز پر وزیراعلیٰ مریم نوازکا شکریہ ادا کیا۔وزیراعلی مریم نواز لاہور ڈویلپمنٹ پلان پراجیکٹ دیکھتے دیکھتے سبزی کی دکان پر پہنچ گئیں۔ سبزیوں کے ریٹ پوچھے اور دکان پر سرکاری نرخنامہ بھی چیک کیا۔
وزیراعلی مریم نواز نے کہا کہ سارا دن مجھے فکر ہوتی ہے کہ عوام کے لئے کھانے پینے کی چیزیں مہنگی نہ ہو جائیں۔ وزیراعلیٰ مریم نواز نے چوبرجی کے علاقے مین بازار کا دورہ کیا۔ شہریوں نے بازار کی نئی بننے والی سڑک عرصہ دراز سے ٹوٹی اور خراب ہونے کے بارے میں بتایا۔وزیراعلی مریم نواز نے کہا کہ میں چاہتی تھی کہ خود جا کر دیکھوں کہ لاہور کے علاقوں کی گلیاں کیسی ہیں۔کوئی خدمت میرے لائق ہو تو بتائیں۔
وزیراعلی مریم نوازکو دیکھ کر شہری پاس آ گئے،وزیراعلی مریم نواز شریف نے صفائی اور پراجیکٹس کے بارے میں پوچھا۔ ایک شہری نے وزیراعلی مریم نوازسے گفتگو کرتے ہوئے بتایا کہ کسی وزیراعلیٰ نے ہمارا یہاں کبھی حال تک نہیں پوچھا،آپ یہاں آنے والی پہلی وزیراعلیٰ ہیں۔ہماری گلیاں ٹوٹی ہوئی تھیں،ہر طرف گندگی تھی،آپ نے سب ٹھیک کرایا،اللہ اجر دے۔ وزیراعلی مریم نواز شریف نے کہا کہ میں گلیاں اور روڈز بنتے دیکھنا چاہتی تھی،اسی لئے خود آئی ہوں۔
Short Link: https://urdu.app.com.pk/urdu/?p=596542
