لاہور۔5مئی (اے پی پی):وزیراعلیٰ پنجاب مریم نواشریف نے لاہور میں جرائم میں کمی پر لاہور پولیس کو شاباش دی ہے۔ وزیراعلیٰ مریم نواز سے آئی جی ڈاکٹر عثمان انور، سی سی پی او بلال صدیق کمیانہ،ڈی آئی جی ایڈمن عمران کشور، ڈی آئی جی آپریشنزلاہورفیصل کامران اور ڈی آئی جی انویسٹی گیشن ذیشان رضا نے ملاقات کی۔ وزیراعلیٰ کی طرف سے پولیس ٹیم کو ظہرانہ بھی دیا گیا۔ ملاقات میں وزیراعلیٰ نے کرائم ریٹنگ میں کمی پر پولیس کی کاوشوں کو سراہا۔مریم نوازشریف نے لاہور میں جرائم میں کمی کو خوش آئند قرار دیا ہے۔وزیراعلیٰ نے کہا کہ ہر شہری کے جان ومال کا تحفظ ریاست کی ذمہ داری ہے، شہری امن و امان کے قیام کے لئے پولیس سے تعاون و معاونت کریں۔
انہوں نے کہا کہ رینکنگ متعارف کرانے سے لاہور سمیت دیگر شہروں میں کرائم کی شرح میں کمی آ رہی ہے،کرائم کا گراف نیچے آنا شاندار پولیسنگ کا نتیجہ ہے۔ وزیراعلیٰ نے کہا کہ لاہور پولیس آپریشن ونگ کی کارکردگی کی بنیاد پر کرائم انڈکس میں لندن اور نیویارک سے محفوظ شہر قرار دیا جانا اہم سنگ میل ہے۔کرائم فائٹنگ کی بہتر حکمت عملی کی بدولت لاہور سیف سٹی میں شامل ہوچکا ہے۔لائن اینڈ آرڈر کے چیلنجز کے باوجود کرائم میں کمی کا ہدف پورا ہونا بہترین ٹیم ورک کا نتیجہ ہے۔ وزیراعلیٰ مریم نواز نے کہا کہ سی ٹی ڈی کو فعال کردیا گیا ہے،لاہور سمیت ہر شہر کو محفوظ ترین بنائیں گے۔ کے پی آئی متعارف کرانے سے پولیس اور انتظامیہ کی پرفارمنس بہتر ہوئی ہے۔
جدید ٹیکنالوجی، فوری فیڈ بیک اور موثر مانیٹرنگ سے پولیسنگ کو بہتر بنایا گیا ہے۔پولیس میں احتساب کے عمل کو یقینی بنایا گیا ہے۔
Short Link: https://urdu.app.com.pk/urdu/?p=592992
