لاہور۔7جولائی (اے پی پی):وزیراعلی پنجاب مریم نواز نے ضلع اٹک میں دریائے سندھ میں خطرناک حد تک طغیانی کے پیش نظر ہائی الرٹ رہنے کی ہدایات جاری کیں۔ وزیر اعلی نے ریسکیو 1122، ضلعی انتظامیہ، پولیس اور تمام متعلقہ اداروں کومستعد اور تیار رہنے کا حکم جاری کرتے ہوے کہا ہے کہ دریائوں کے کنارے تمام حساس مقامات کی فوری طور پر جانچ کی جائے خطرہ ہو تو عوام کو محفوظ مقامات پر منتقل کیا جائے۔ دریا کی طغیانی سے کسی بھی جانی و مالی نقصان کو روکنے کیلئے تمام وسائل بروئے کار لائے جائیں۔
وزیراعلیٰ نے کہا کہ دریا کے بہائو اور بندوں کی صورتحال کی مسلسل نگرانی کی جائے۔ عوام کو ریسکیو کے پیشگی حفاظتی اقدامات سے آگاہ رکھا جائے۔ ریسکیو ٹیمیں ہر وقت تیار رہیں ضروری مشینری اور کشتیاں دستیاب رکھی جائیں۔ نشیبی علاقوں سے لوگوں کی محفوظ مقامات پر منتقلی یقینی بنائی جائے۔
