لاہور۔25فروری (اے پی پی):وزیراعلیٰ پنجاب مریم نواز شریف نے 35سال بعد 16روزہ ہارس اینڈ کیٹل شو کے کامیاب انعقاد پر عوام کو مبارکباد دی ہے۔وزیر اعلیٰ مریم نواز نے ہارس اینڈ کیٹل شو کی آرگنائزنگ ٹیم کو اپنے پیغام میں کہا کہ پانچ ماہ میں آپ نے مسلسل محنت سے کام کیا،ہارس اینڈ کیٹل شو کی کامیابی آپ اور آپ کی ٹیم کی محنت، لگن اور تخلیقی صلاحیتوں کا ثبوت ہے۔
پی ایچ اے کے ڈائریکٹر جنرل طاہر وٹو،ان کے افسران اور عملے کے تمام افراد کو بھی شاباش،آپ کی محنت بچوں اور بڑوں کے چہروں پر خوشیاں لائی۔وزیراعلیٰ مریم نواز نے کہا کہ ہارس اینڈ کیٹل شو کی کامیابی کو دیکھتے ہوئے اس جیسی تفریحی تقریبات کا دائرہ کار صوبے بھر میں پھیلانے کا فیصلہ کیا ہے۔عوام کی تفریح کے لئے انٹرٹینمنٹ ایونٹس اور تفریحی پروگرام کراتے رہیں گے۔
ہارس اینڈ کیٹل شو کی شاندار روایت کو بھی جاری رکھیں گے۔وزیراعلیٰ مریم نواز نے کہا کہ 9 سے 24فروری تک ہارس اینڈ کیٹل شو سے پنجاب کے رنگ اجاگر ہوئے،شہریوں کو خوشی ملی،20 بڑے ایونٹس میں بچوں اور ہزاروں فیملیزشریک ہوئیں،13انٹرنیشنل ٹیموں کی آمد سے پاکستان اور پنجاب کا عالمی امیج روشن ہوا اورسالوں بعد شہریوں نے لاہور میں شندور پولو، 7روزہ نیزہ بازی، بز کشی،تیر اندازی اور گھڑ سواروں کے سنسنی خیزمقابلے دیکھے۔
وزیراعلیٰ مریم نواز نے کہا کہ پنجاب کے صوفیانہ رنگ اجاگر ہوئے، گلگت بلتستان کی ثقافتی سرگرمیوں کو فروغ ملا اور روایتی کھانوں کی بہار رہی،چلڈرن فیسٹیول، ڈاگ شو، پھولوں، نادر اور نایاب گاڑیوں کی نمائش، رستم پنجاب دنگل کے سنسنی خیز مقابلوں نے ہارس اینڈ کیٹل شو کا لطف دوبالا کیا۔مریم نواز نے کہا کہ عید کے بعد لاہور ایکسپو سنیٹر میں صنعتی نمائش کا انعقاد کیا جائے گا۔وزیراعلیٰ مریم نواز کی ہدایت پر ہارس اینڈ کیٹل شو سینئر منسٹر مریم اورنگزیب کی نگرانی اور سربراہی میں منعقد ہوا۔
Short Link: https://urdu.app.com.pk/urdu/?p=566100
