لاہور۔23مارچ (اے پی پی):وزیراعلیٰ پنجاب مریم نوازشریف نے یوم پاکستان کے مو قع پر اپنے پیغام میں قوم کو مبارکباد دیتے ہو ئے بانیان پاکستا ن کی جدوجہد اور شہدا ء کی قربانیو ں کو خراج تحسین پیش کیا ہے۔وزیراعلیٰ پنجاب نے کہا کہ23مارچ ہمیں قیام پاکستان کے سنہری اغراض و مقاصد کی یاد دہانی کراتا ہے، اللہ تعالی کے فضل وکرم سے پاکستان قائم ہوا اور تا قیامت شاد وآباد رہے گا،پاکستان کو اللہ تعالی نے دنیائے ا سلام کی پہلی ایٹمی طاقت بننے کا منفرد اعزاز بھی عطا کیا۔
وزیراعلیٰ مریم نوازشریف نے کہا کہ یوم پاکستان پر پاک سر زمین کے تقدس اور حفاظت کے تقاضوں کے عہد کا اعادہ کیا جانا چاہیے اوریوم پاکستان پر اتحاد، ایمان اور نظم و ضبط کے سنہری اصولوں کو بھی دہرانا اوریاد رکھنا چاہیے۔وزیراعلیٰ پنجاب نے کہا کہ پاکستان ہم سب کیلئے اللہ تعالی کی عطا کردہ نعمت غیرمترقبہ ہے ۔انہوں نے کہا کہ یوم پاکستان پر غربت میں کمی، عدم مساوات اور معاشرے کے کمزور طبقات کے تحفظ کا عہد کرتے ہیں ۔
وزیراعلیٰ مریم نواز نے کہا کہ یوم پاکستان ہمیں حصول پاکستان کی بھرپور جدوجہد کے آغاز کی یاد دلاتا ہے،آج ہم وطن عزیز کو ترقی یافتہ ممالک کی صف میں شامل کرنے کیلئے اپنی تمام تر صلاحیتیں بروئے کار لانے اور پنجاب کو قائد اعظم اور دیگر بانیانِ پاکستان کے وژن کے مطابق بلندیوں پر گامزن کر نے کا عہد کر تے ہیں۔مریم نواز شریف نے مزید کہا کہ یوم پاکستان پر تعلیم، صحت اور زراعت میں جدت سمیت پنجاب کو پاکستان کی معیشت کا انجن اور ترقی کا مرکز بنانے کا عہد کر تے ہیں۔
Short Link: https://urdu.app.com.pk/urdu/?p=575669
