کراچی۔ 09 جولائی (اے پی پی):وزیراعلی سندھ سید مراد علی شاہ نے وزیراعلی ہائوس میں ایک پروقار تقریب کی صدارت کی، جس میں گریڈ 20اور 21میں ترقی پانے والے سینئر پولیس افسران کو رینکس لگائے گئے۔ بدھ کو وزیر اعلی ہائوس سے جاری اعلامیہ کے مطابق تقریب کا مقصد ان افسران کی دہائیوں پر محیط خدمات کا اعتراف اور ان کی محنت کو خراج تحسین پیش کرنا تھا۔
وزیراعلی سندھ نے خود ایڈیشنل انسپکٹر جنرل (اے آئی جیز)اور ڈپٹی انسپکٹر جنرل(ڈی آئی جیز)کو رینکس لگائے اور ان کی خدمت، ایمانداری اور قیادت کے جذبے کو سراہا۔گریڈ 21میں ترقی پانے والے افسران میں ذوالفقار لاڑک، شرجیل کھرل، آزاد خان اور اقبال دارا شامل ہیں جبکہ گریڈ 20میں ترقی پانے والے افسران میں جنید شیخ، عمران شوکت، عباس رضوی، شیراز نذیر ، شوکت کھتران اور شاد ابنِ مسیح شامل ہیں۔تقریب سے خطاب کرتے ہوئے وزیراعلی سندھ سید مراد علی شاہ نے کہا کہ یہ صرف ترقی نہیں بلکہ ذمہ داری میں اضافہ ہے، آپ سب سے ایمانداری، پیشہ ورانہ لگن اور قیادت کی توقع ہے۔
انہوں نے کہا کہ سندھ میں امن و امان کی صورتحال میں بہتری آئی ہے، لیکن اب وقت ہے کہ اسے مثالی بنایا جائے۔ سید مراد علی شاہ نے افسران کی طویل سروس کو سراہتے ہوئے کہا کہ اس مقام تک پہنچنے میں 20سے 22سال کی مستقل محنت لگتی ہے۔ تقریب میں وزیر داخلہ ضیا الحسن لنجار، آئی جی پی سندھ غلام نبی میمن، ہوم سیکریٹری اقبال میمن، وزیراعلی کے سیکریٹری رحیم شیخ، ایڈیشنل آئی جی کراچی جاوید عالم اوڈھو اور دیگر سینئر پولیس افسران نے شرکت کی۔اس موقع پر ترقی پانے والے افسران کے اہل خانہ بھی موجود تھے ۔
