کراچی۔ 14 اگست (اے پی پی):وزیراعلی سندھ سید مراد علی شاہ نے یومِ آزادی کے موقع پر بانی پاکستان قائداعظم محمد علی جناح کے مزار پر حاضری دی، جہاں صوبائی کابینہ کے اراکین، مشیران، معاونینِ خصوصی، چیف سیکریٹری اور انسپکٹر جنرل آف پولیس نے ان کا پرتپاک استقبال کیا ۔جمعرات کو وزیر اعلی ہائوس سے جاری اعلامیہ کے مطابق وزیر اعلی سندھ سیدمراد علی شاہ نے گورنر سندھ کامران ٹیسوری کے ہمراہ قومی پرچم لہرایا، بعد ازاں انہوں نے بانی پاکستان قائداعظم محمد علی جناح کے مزار پر فاتحہ خوانی کی اور بابائے قوم کو خراج عقیدت پیش کرتے ہوئے مہمانوں کی کتاب میں اپنے تاثرات درج کیے۔
اس موقع پر سید مراد علی شاہ نے مزار قائد پر موجود اسکول کے بچوں اور عوام سے ملاقات کی، جنہوں نے پرجوش نعروں سے ان کا استقبال کیا، اسکول کے بچوں نے قومی ترانہ پیش کیا،ملی نغمے گائے۔وزیر اعلی سندھ سید مراد علی شاہ نے پاکستان کے یوم آزادی کے موقع پر قوم کے نام اپنے پیغام میں کہا ہے کہ 14اگست خوشی کے ساتھ ساتھ ملک کی ترقی اور اتحاد کے عزم کو تازہ کرنے کا دن ہے۔ انہوں نے کہا کہ قائداعظم محمد علی جناح کی تعلیمات آج بھی مشعلِ راہ ہیں، ہم قائداعظم کے کام، کام اور صرف کام کے اصول پر پختہ یقین رکھتے ہیں۔ انہوںنے کہا کہ سندھ ہمیشہ قومی یکجہتی، رواداری اور ہم آہنگی کا علمبردار رہا ہے، سندھ کے عوام نے اخوت، رواداری، جمہوریت اور آئین کی بالادستی کی اقدار کو مسلسل اپنایا ہے۔
انہوں نے شہداء کو شاندار خراج عقیدت پیش کرتے ہوئے کہا کہ ان کی قربانیاں پوری قوم کے لیے باعث فخر اور مشعل راہ ہیں۔وزیراعلی سندھ نے تمام شہریوں پر زور دیا کہ وہ دہشت گردی، غربت اور جہالت کے خلاف مضبوط موقف اختیار کریں۔انہوں نے اس بات پربھی زور دیتے ہوئے کہاکہ ملک کی ترقی، خوشحالی اور سالمیت کے لیے اتحاد ضروری ہے۔ انہوں نے تعلیم، صحت، روزگار اور زراعت پر خصوصی توجہ کے ساتھ لوگوں کو بنیادی سہولیات فراہم کرنے کے لیے اپنی حکومت کے عزم کا اعادہ کیا۔
وزیراعلی سندھ نے کہا کہ ہر شہری کے لیے یکساں مواقع کو یقینی بنانا ہمارا مشن ہے۔ انہوں نے مزید کہا کہ حکومت پاکستان کو ایک جدید، پرامن اور خوشحال ملک بنانے کے لیے انتھک محنت کر رہی ہے۔یوم آزادی پر پوری قوم کو دلی مبارکباد پیش کرتے ہوئے وزیراعلی سید مراد علی شاہ نے پاکستان کی سلامتی اور مسلسل ترقی کے لیے دعا کی۔تقریب میں مختلف ممالک کے سفارت کار، سول سوسائٹی کے ارکان اور طلبا ء بڑی تعداد شامل تھے ۔ گارڈ آف آنر کے بعد وزیراعلی سندھ نے اپنے دورہ کا اختتام کیا اور مزار سے روانہ ہوئے۔
