کراچی۔ 06 فروری (اے پی پی):نگراں وزیراعلی سندھ جسٹس (ر)مقبول باقر کی زیر صدارت 30ویں صوبائی ایپکس کمیٹی کا اجلاس وزیراعلی ہائوس میں منعقد ہوا جس میں انتخابی انتظامات اور نیشنل ایکشن پلان کا جائزہ لیا گیا۔
منگل کو جاری اعلامیہ کے مطابق اجلاس میں صوبائی وزرا بریگیڈیئر (ر)حارث نواز، عمر سومرو، احمد شاہ، کور کمانڈر لیفٹیننٹ جنرل بابر افتخار، چیف سیکرٹری ڈاکٹر فخر عالم، ڈی جی رینجرز میجر جنرل اظہر وقاص، آئی جی پولیس رفعت مختار، ایڈووکیٹ جنرل حسن اکبر، چیئرمین پی اینڈ ڈی شکیل منگنیجو، ہوم سیکرٹری اقبال میمن، پی جی فیاض شاہ اوردیگر نے شرکت کی۔ اپیکس کمیٹی کے اجلاس میں وزیراعلی نے آئندہ الیکشن کے انتظامات کا جائزہ لیا۔ کمیٹی کو بتایا گیا کہ کل 19008پولنگ اسٹیشنز میں 5657 نارمل، 6550 حساس اور 6801 انتہائی حساس پولنگ اسٹیشنز شامل ہیں۔
آئی جی پولیس رفعت مختار نے پولیس کی تعیناتی سے متعلق بتاتے ہوئے کہا کہ عام پولنگ اسٹیشن پر چار پولیس اہلکار، ایک حساس پولنگ اسٹیشن پر پانچ اور انتہائی حساس پولنگ اسٹیشن پر سات پولیس اہلکار تعینات کیے جائیں گے۔ پولنگ اسٹیشنوں پر کل 143,156 پولیس اہلکار تعینات کیے جائیں گے جن میں عام پولنگ اسٹیشنوں پر 95,400، کیو آر ایف پولیس کے 10,648، اور معاون فورس کے 37,108 اہلکار شامل ہیں۔
مزید برآں پولیس فورس کے علاوہ منتخب انتہائی حساس پولنگ اسٹیشنوں پر کیو آر ایف ڈیوٹیوں کیلئے رینجرز اور فوج کو تعینات کیا جائے گا۔ کور کمانڈر کراچی لیفٹیننٹ جنرل بابر افتخار نے وزیراعلی سندھ کو بتایا کہ عام انتخابات کے دوران تھرڈ ٹیئر فوج کے دستے صوبے بھر میں بھیجے گئے ہیں۔ وزیراعلی نے انتخابی انتظامات پر اطمینان کا اظہار کرتے ہوئے بتایا کہ انہوں نے انتظامات کا جائزہ لینے کیلئے صوبے کے ڈویژنل ہیڈ کوارٹرز کا ذاتی دورہ کیا۔
اجلاس میں موجود علاقائی الیکشن کمشنرز نے بھی سکیورٹی سمیت تمام انتظامات پر اطمینان کا اظہار کیا۔ وزیراعلی نے نشاندہی کی کہ نومبر 2023 میں اسٹریٹ کرائم کی صورتحال پریشان کن تھی، روزانہ اوسطا 265 اسٹریٹ کرائمز رپورٹ ہوئے، 15 مددگار سست روی کا شکار تھی ( 10منٹ سے زیادہ)، پولیس کی گاڑیاں ناسازگار حالت میں تھیں اور منظم گروہ کی چیکنگ نہیں تھی ۔ اس پر آئی جی نے کہا کہ 386 موٹرسائیکلوں پر مشتمل خصوصی موٹرسائیکل سکواڈ جو شہید فورس کے نام سے جانا جاتا ہے، مصروف اوقات اور مقامات کی نشاندہی کے لیے قائم کیا گیا ہے۔ انہوں نے مزید کہا کہ مددگار 15کو مزید 300 گاڑیوں اور 120 موٹر بائیکس کی تعیناتی کے ساتھ نئے سرے سے تشکیل دیا گیا ہے۔
رفعت مختار نے انکشاف کیا کہ ( AMLایڈوانس موبائل لوکیشن)کی فراہمی کے لیے درست مقامات کے لیے یورپی ایمرجنسی نمبر ایسوسی ایشن EENA112 کے ذریعے گوگل اور ایپل کے ساتھ کوششیں جاری ہیں۔ انہوں نے مزید کہا کہ درست مقامات کے لیے اینڈرائیڈ اور آئی او ایس ایپ کے ذریعے ڈائل کرنے کے لیے 10 فروری تک ایک ایپلی کیشن شروع کی جائے گی۔ کال سینٹر میں 30 نئے کمپیوٹر ٹرمینلز اور آٹھ بڑی اسکرینیں فورس کی نمائش کیلئے شامل کی گئی ہیں۔
کال ایجنٹس کو جامعہ کراچی کی جانب سے ہمدردی کے حوالے سے دو مرتبہ تربیت دی جاتی ہے۔ مددگار 15کی کامیابیوں کے بارے میں بات کرتے ہوئے اجلاس کو بتایا گیا کہ کال کا جواب دینے اور رسپانس کا تناسب 92 سے بڑھ کر 98 فیصد ہو گیا ہے۔ گاڑیوں کے درست مقامات کے نظام کے استعمال اور اضافی گاڑیوں اور بائک کی تعیناتی کے ساتھ موبائلز کا اوسط جوابی وقت 10 منٹ سے کم ہو کر 6 منٹ ہو گیا۔
آئی جی پولیس نے کہا کہ اسٹریٹ کرمنلز کے ساتھ مصروفیات میں اضافہ کیا گیا ہے اور کہا کہ ستمبر 23 سے 24 جنوری تک 581 مقابلے ہوئے جن میں 71 جرائم پیشہ افراد ہلاک، 615 جرائم پیشہ افراد زخمی، 1037 کو رنگے ہاتھوں گرفتار کیا گیا۔ نتیجتا 2023ً کے دوران اسٹریٹ کرائمز میں 4.19 فیصد کمی آئی ہے۔ آئی جی پولیس نے کہا کہ روزانہ اوسطا اسٹریٹ کرائمز کم ہو کر 213 رہ گئے ہیں یعنی 19 فیصد کمی رہی۔اجلاس کو بتایا گیا کہ کچے کے علاقوں خصوصا دریائے سندھ کے بائیں کنارے پر امن و امان کی صورتحال بہتر ہوئی ہے۔
اغوا برائے تاوان (KFR)، ڈکیتی جیسے بڑے جرائم قابو میں ہیں۔ گشت اور پکٹنگ کو بڑھا دیا گیا ہے، آئی جی پولیس کا کہنا ہے کہ ڈاکوں کے خلاف جاری کارروائی سے ضلع کشمور پریشان ہے۔ ڈاکو مزید حملوں اور KFRs کے ساتھ قانون نافذ کرنے والے اداروں کو پیچھے ہٹنے کے لیے دبا ڈالنے کا چیلنج دیتے ہیں۔ ڈی جی رینجرز میجر جنرل اظہر وقاص نے اجلاس کو بتایا کہ رینجرز نے کچے کے علاقوں میں 47 انٹیلی جنس بیسڈ آپریشنز بھی کیے اور 145 ڈاکو/جرائم پیشہ افراد کو گرفتار کیا، 86 سے زائد اسلحہ اور 5248 ایمونیشن رانڈز برآمد کیے گئے۔
انہوں نے مزید کہا کہ انڈس ہائی وے/نیشنل ہائی وے پر نقل و حرکت کو محفوظ بنانے کیلئے 10 اضافی چیک پوسٹیں اور ایک بیس کیمپ قائم کیا گیا ہے۔ ڈی جی رینجرز نے کہا کہ وزیر اعلی کی ہدایت پر گھوٹکی پل کی تعمیراتی جگہ کی حفاظت کے لیے پلاٹون رینجرز کو تعینات کیا گیا ہے۔ اب پل پر تعمیراتی کام شروع کر دیا گیا ہے۔
سیکرٹری داخلہ اقبال میمن نے اجلاس کو بتایا کہ صوبائی حکومت نے 43,623 غیر قانونی غیر ملکیوں کو وطن واپس لائی ہے جن میں سے 42,093 رضاکارانہ طور پر واپس آئے اور 1,530 کو یکم اکتوبر 2023 سے ڈی پورٹ کیا گیا۔ اس بات کی نشاندہی کی گئی کہ 81,106 غیر قانونی غیر ملکی پی او آر کارڈ ہولڈر اور 65,936 اے سی سی ہولڈر تھے۔ اجلاس کو بتایا گیا کہ 2022 میں دہشت گردی کے 165 مقدمات درج ہوئے جن میں سے 147 کے چالان ہوئے، 64 مقدمات زیر سماعت ہیں اور 16 کو سزا ہو چکی ہے۔
تقابلی طور پر 2023 میں دہشت گردی کے 285 مقدمات درج ہوئے جن میں سے 252 کے چالان ہوئے، چالان کیے گئے 209 مقدمات زیر سماعت تھے اور 23 کو سزائیں سنائی گئیں۔ ڈی جی رینجرز نے اجلاس کو بتایا کہ کالعدم تنظیموں/دہشت گردوں کے خلاف فعال حکمت عملی اپنائی گئی ہے۔ انہوں نے مزید کہا کہ رینجرز نے 42 آپریشن کیے ہیں، اور فعال ردعمل کے ذریعے 44 تھریٹ الرٹس کو کم کیا ہے۔
رینجرز نے لیاری، اورنگی، لانڈھی، کورنگی گڈاپ اور دیگر علاقوں میں دہشت گردی کی کارروائیوں کی روک تھام کے لیے 121 کومبنگ آپریشنز کیے ۔ رینجرز نے چاکیواڑہ، گلبہار، جمشید مقام اور سہراب گوٹھ میں شکایات پر 25 بھتہ خوروں کو گرفتار کیا۔ ڈی جی رینجرز نے کہا کہ رینجرز نے انکی مدد کے لیے تجارتی اداروں/کاروباری برادری کے ساتھ قریبی رابطے استوار کیے ہیں۔
رینجرز نے 176 آپریشنز کرنے میں پولیس کا ساتھ دیا جن میں 14 جرائم پیشہ گروہوںرکشہ ڈکیت گینگ، اسلحہ سپلائی کرنے والے گینگ اور منشیات فروشوں سمیت 650 مجرموں کو گرفتار کیا گیا۔ رینجرز نے سال 2023میں 71 مکروہ مجرموں کو گرفتار کیا۔ رینجرز نے پولیس کے ساتھ مل کر جرائم پیشہ عناصر کے خلاف کومبنگ آپریشن کیا۔ کمیٹی نے عزم کیا کہ عسکریت پسندی کے خلاف زیرو ٹالرنس ہو گا۔
کسی بھی مجرم یا مسلح گروہ کو کام کرنے کی اجازت نہیں دی جائے گی۔ اجلاس کو بتایا گیا کہ اس وقت 126 افراد فورتھ شیڈول پر ہیں جن میں سے 31 جیل میں ہیں، 28 لاپتہ ہیں اور سات کا سراغ لگا لیا گیا ہے۔ اجلاس میں ناجائز اسلحہ، منشیات/منشیات مافیا، کالعدم تنظیموں اور دہشت گردی کی مالی معاونت کے خلاف کارروائی کا بھی جائزہ لیا گیا۔
