وزیراعلی مریم نوازکی زیرِ صدارت محکمہ صحت، ترقیاتی منصوبوں کیلئے اجلاس،ہرنمایاں شہر میں کارڈیالوجی سینٹر بنانے کا اصولی فیصلہ

لاہور۔6مئی (اے پی پی):وزیراعلی پنجاب مریم نواز شریف نے سرکاری ہسپتالوں کیلئے سٹیٹ آف آرٹ جدید ترین طبی آلات خریدنے اور مریضوں کی ضرورت کے پیش نظر طبی آلات ترجیحا فراہم کرنے کی ہدایت کی۔اس حوالے سے وزیراعلی مریم نواز شریف کی زیرِ صدارت خصوصی اجلاس منعقد ہوا،جس میں ہیلتھ کے تمام پراجیکٹ کا تفصیلی جائزہ لیا گیا۔وزیراعلی مریم نواز نے نواز شریف میڈیکل ڈسٹرکٹ کا جامع پلان طلب کر لیا۔اس موقع پر نواز شریف میڈیکل ڈسٹرکٹ میں سکول آف پیرا میڈیکس بنانے کی تجویز پر اتفاق کیا گیا۔

اجلاس میں انسٹیٹیوٹ آف جینٹک اینڈ بلڈ ڈیزیز نواز شریف میڈیکل ڈسٹرکٹ بنانے کا فیصلہ کیا گیا۔نواز شریف میڈیکل ڈسٹرکٹ میں سرجیکل آرتھو پیڈک میڈیسن ری ہیبلی ٹیشن بنے گا۔وزیراعلی مریم نوازشریف نے لیڈی ولنگٹن ہسپتال پراجیکٹ کی چھ ماہ میں تکمیل کی ہدایت کی اور زیرتکمیل ہیلتھ پراجیکٹس کی بر وقت تکمیل کیلئے اقدامات کا حکم دیا۔اجلاس میں ہر نمایاں شہر میں کارڈیالوجی سینٹر بنانے کا اصولی فیصلہ بھی کیا گیا۔

وزیراعلی مریم نواز شریف نے راولپنڈی میں چلڈرن ہسپتال کی تکمیل کیلئے فنڈز کے اجرا کی ہدایت کی اور چلڈرن ہسپتال راولپنڈی کے لئے بہترین ڈاکٹر کی خدمات حاصل کرنے کا حکم دیا۔اجلاس میں وزیراعلی مریم نواز کو سپیشلائزڈ ہیلتھ کیئر اینڈ میڈیکل ایجوکیشن کے جاری اور نئے پراجیکٹ پر مکمل بریفنگ دی گئی۔

وزیراعلی مریم نواز نے کہا کہ 60 فیصد سے زائد مکمل پراجیکٹ کی جلد تکمیل پر توجہ دی جائے۔ ہیلتھ پراجیکٹس میں تاخیر سے عوامی مشکلات کے ساتھ لاگت بھی بڑھ جاتی ہے۔

Short Link: https://urdu.app.com.pk/urdu/?p=593438