وزیراعلی مریم نواز کا جنگلی حیات کے عالمی دن کے موقع پر پیغام

لاہور۔3مارچ (اے پی پی):وزیر اعلی پنجاب مریم نوازنے جنگلی حیات کے عالمی دن پر اپنے پیغام میں کہا کہ پنجاب کو جنگلات، جنگلی حیات کے تحفظ اور فروغ کا رول ماڈل بنائیں گے۔ صوبے کی تاریخ میں پہلی وائلڈ لائف فورس بنائی اور خواتین کو اس فورس کا حصہ بنایا گیا۔ وائلڈ لائف فورس سے جنگلی حیات کے تحفظ میں بڑی مدد ملے گی۔ وزیراعلی نے اپنے پیغام میں کہا کہ پنجاب میں جنگلات اور جنگلی حیات کے تحفظ کے لئے جامع اقدامات ہمارے عزم کا واضح ثبوت ہے۔

پہلی حکومت ہے جو انسانوں کے علاوہ جانوروں کے حقوق کے احترام اور تحفظ کی اسلامی تعلیمات اور قانونی تقاضوں پر عمل کرا رہی ہے۔ انہوں نے کہا کہ ایک سال کے دوران پورے پنجاب میں جانوروں پر تشدد، ایزا رسانی، غیرقانونی تحویل اور شکار پر سخت ترین اقدامات ہوئے ہیں۔ پہلی بار جانوروں کے حقوق اور تحفظ کے قانون کو جامع اور رولز کو موثر بنایا گیا ہے۔ وزیراعلی نے کہا کہ جنگلی جانوروں اور پرندوں کے غیر قانونی شکار پر جرمانے اور مقدمات درج ہوئے۔

Short Link: https://urdu.app.com.pk/urdu/?p=568380