لاہور۔12مارچ (اے پی پی):وزیراعلی پنجاب مریم نواز کے ویژن کے تحت پبلک سکول آر گنائزیشن پروگرام کامیابی سے جاری ہے۔ سرکاری سکولوں کا انتظام اعلی تعلیم یافتہ نوجوانوں کے سپرد کرنے کے شاندار ثمرات سامنے آرہے ہیں۔ پبلک سکول آرگنائزیشن پروگرام کے بعدصوبے بھر کے 5863 سکولوں میں طلبہ کی تعداد میں 52 فیصد اور ٹیچرزکی تعداد میں 89 فیصداضافہ ہوا ہے۔ طلبہ کی تعداد 2لاکھ 42ہزار سے بڑھ کر تین لاکھ 68ہزار سے زائد ہو گئی ہے۔ پنجاب بھر میں پہلے فیز کے بعد ٹیچرز کی تعداد 8037 سے بڑھ کر 15114ہوگئی ہے۔
نجی انتظام میں سرکاری سکولوں میں اساتذہ کی تنخواہ میں تین گنا تک کااضافہ ہوا۔ نئے انتظام کے بعد طلبہ کے لئے کرسیاں اور ڈیسک وغیرہ کی تعداد 3 لاکھ 71ہزار سے بڑھ کر5 لاکھ 23ہزارہو گئی ہے۔پبلک سکول آرگنائزیشن پروگرام کے تحت چند ماہ میں ہی 35 نئے کلاس رومز بنائے گئے اور 459 کی تعمیر و مرمت مکمل کی گئی۔ آئوٹ سورس سکولوں میں 110نئے ٹائلٹ بنائے گئے اور 2762 کی تعمیر و مرمت کی گئی۔ 158سکولوں کی بائونڈری وال اور واٹر سپلائی کے لئے 1389 واٹر پمپ بھی نصب کیے گئے۔
آئوٹ سورسنگ کے بعد سکولوں میں اپنی مدد آپ کے تحت نئی اور جدید ترین کمپیوٹر لیبز بھی بنائی گئیں۔
Short Link: https://urdu.app.com.pk/urdu/?p=571727
