نیویارک۔21ستمبر (اے پی پی):وزیرخارجہ بلاول بھٹو زرداری کی سربراہی میں دنیا کے نوجوان وزرائے خارجہ کی کانفرنس منعقد ہوئی۔ کانفرنس میں عالمی برادری کے مسائل اور ان کے حل پر بات چیت کی گئی۔ وزیرخارجہ بلاول بھٹو زرداری کی سربراہی میں ہونے والی کانفرنس میں کینیڈا، چیک ری پبلک، ہنگری، قطر اور سربیا سمیت مختلف ممالک کے نوجوان وزرائے خارجہ نے شرکت کی۔
وزیر مملکت برائے امور خارجہ حنا ربانی کھر نے بھی نوجوان وزرائے خارجہ کی کانفرنس میں شرکت کی۔اس موقع پر اپنے خطاب میں وزیر خارجہ بلاول بھٹو زرداری نے کہا کہ ہمیں نہ صرف امن اور ترقی کے حوالے سے چیلنجز سے نمٹنا ہوگا بلکہ مستقبل کی نسلوں کے لئے مساوی معاشی حقوق کی بھی جدوجہد کرنا ہوگی۔ انہوں نے کہا کہ آپ سب دنیا کے نوجوان وزرائے خارجہ ہیں اور آپ عالمی برادری کے ایک دوسرے سے تعاون کے حوالے سے اہم ترین کردار ادا کرسکتے ہیں۔
بلاول بھٹو زرداری نے کہا کہ دنیا کے نوجوان وزرائے خارجہ کی ایک دوسرے سے ملاقات کا مقصد دنیا کے مستقبل کے لئے ایک لائحہ عمل تشکیل دینا ہے۔ وزیر خارجہ بلاول بھٹو زرداری کے ہم منصبوں نے ان کے دنیا کے مختلف نوجوان وزرائے خارجہ کو اکھٹا کرنے کے اقدام کو سراہا اور شرکت کرنے والے تمام نوجوان وزرائے خارجہ نے وزیرخارجہ بلاول بھٹو زرداری کا ساتھ دینے کا عزم کیا۔
Short Link: https://urdu.app.com.pk/urdu/?p=328273
