اسلام آباد۔1اپریل (اے پی پی):وزیرِاعظم محمد شہباز شریف کی ہدایت پر این ڈی ایم اے کی جانب سے میانمار میں شدید زلزلے اور اسکے نتیجے میں پیدا ہونے والی صورتحال کے تناظر میں زلزلہ متاثرین کیلئے امدادی سامان کی پہلی کھیپ منگل کو روانہ ہو گی۔
وزارت پارلیمانی امور کی جانب سے جاری اعلامیہ کے مطابق اسلام آباد انٹرنیشنل ایئرپورٹ سے میانمار کیلئے امدادی سامان کی بڑی کھیپ لے کر ہوائی جہاز روانہ ہوگا، امدادی سامان کی پہلی کھیپ میں 35 ٹن امدادی اشیاء شامل ہیں۔ امدادی سامان میں 565خیمے، 210 ترپالیں، 2000 کمبل، 1ٹن تیار کھانا، 0.5 ٹن ادویات اور 10 واٹر ماڈیولز بھی شامل ہیں۔
وزیرِ اعظم کی ہدایت پر وفاقی وزیر برائے پارلیمانی امور ڈاکٹر طارق فضل چوہدری امدادی سامان کی اپنی نگرانی میں میانمار روانگی یقینی بنانے کیلئے اسلام آباد انٹرنیشنل ایئرپورٹ پر موجود ہونگے۔ ینگون پہنچنے پر میانمار میں پاکستان کے سفیرسمیت اعلی سفارتی اہلکار سامان وصول کر کے میانمار کی وزارتِ سماجی بہبود و بحالی کے حوالے کریں گے۔
Short Link: https://urdu.app.com.pk/urdu/?p=577711
