اسلام آباد۔12جولائی (اے پی پی):وزیرِ اعظم محمد شہباز شریف آج (بدھ کو)اسلام آباد میں پاکستان ایجوکیشن انڈوومنٹ فنڈ اور قومی نصاب میں اصلاحات کا آغاز کریں گے۔بدھ کو وزیراعظم آفس کے میڈیا ونگ کی جانب سے جاری بیان کے مطابق وزیراعظم پاکستان جب خادم اعلیٰ پنجاب تھے،تب انہوں نے پنجاب ایجوکیشن انڈوومنٹ فنڈ کی بنیاد رکھی تھی ،وزیراعظم منتخب ہونے کے بعد انہوں نے پاکستان انڈوومنٹ فنڈ کے قیام کی ہدایت کی ۔
رواں سال اس فنڈ سے 12 ہزار باصلاحیت اور مستحق طلبا و طالبات مستفید ہوں گے جس میں 50 فیصد کوٹہ خواتین کیلئے رکھا گیا ہے۔ آئندہ چار سال میں اس فنڈ سے 10 ارب روپے کے وظائف میرٹ پر دیئے جائیں گے۔وزیرِ اعظم آج قومی نصاب میں آئینِ پاکستان اور کمپیوٹر کوڈنگ کی شمولیت کا بھی آغاز کریں گے۔
اس سے نہ صرف پاکستان کی نسل نو آئین میں تفویض کردہ اپنے بنیادی حقوق کے بارے آگاہ ہوگی بلکہ اس کے ساتھ ساتھ کوڈنگ جیسے جدید ہنر کے حصول سے بین الاقوامی سطح پر افرادی قوت کے مقابلے میں روزگار کے بہتر مواقع حاصل کر سکے گی۔ اس موقع پروزیرِ اعظم تقریب سے خطاب بھی کریں گے۔
