سیالکوٹ۔12مئی (اے پی پی):وزیرِ اعظم محمد شہباز شریف نے امیر جمیعتِ اہل حدیث، سینیٹر پروفیسر ساجد میر کی رہائش پر جاکر ان کے انتقال پر گہرے دکھ اور رنج کا اظہار کیاہے۔وزیر اعظم آفس کے میڈیا ونگ سے جاری بیان کے مطابق وزیرِ اعظم نے مرحوم ساجد میر کی بلندی درجات اور ان کے اہل خانہ کیلئے صبر جمیل کی دعا کی۔
انہوں نے کہا کہ ساجد میر پاکستان کی اہل بصیرت سیاسی شخصیت اور دینی اسکالر تھے ۔ان کی رحلت سے پاکستان کے سیاسی منظر نامے میں ایک ایسا خلا پیدا ہوگیا جو شاہد ہی کبھی پُر ہو سکے۔ وزیرِاعظم نے کہا کہ ساجد میر نے ہمیشہ انتہا پسندی اور فرقہ واریت کے خلاف آواز اٹھائی، جو ان کی سیاست و دین کی خدمات کا سنہری باب ہے،مشکل کی اس گھڑی میں مجھ سمیت پوری قوم کی ہمدردیاں ساجد میر کے اہل خانہ کے ساتھ ہیں۔
وزیراعظم محمد شہباز شریف نے سیالکوٹ میں سابق رکن صوبائی اسمبلی اور مسلم لیگ (ن) کے راہنما مرحوم چوہدری ارشد وڑائچ کی رہائش گاہ پر جاکر مرحوم کے لواحقین سے اظہار تعزیت کیا۔وزیراعظم نے مرحوم کے لئے دعائے مغفرت اور اہل خانہ کے لئے صبر و استقامت کی دعاکی۔وفاقی وزیر برائے منصوبہ بندی و ترقی احسن اقبال اور وفاقی وزیر قانون و انصاف اعظم نذیر تارڑ بھی وزیراعظم کے ہمراہ تھے۔
