بیجنگ۔3ستمبر (اے پی پی):وزیرِ اعظم محمد شہباز شریف نے کوئٹہ میں بلوچستان نیشنل پارٹی کے جلسے میں دھماکے کی شدید الفاظ میں مذمت کرتے ہوئے سیاسی جلسے پر حملے کو بلوچستان میں دہشتگردوں کی انتشار پھیلانے کی گھناؤنی سازش کا منہ بولتا ثبوت قرار دیا ہے ۔
بدھ کواس واقعہ پر اپنے ردعمل میں وزیرِ اعظم نے دھماکے میں قیمتی جانوں کے ضیاع پر دکھ اور افسوس کا اظہار کیا اور واقعہ میں زخمی ہونے والوں کی جلد صحتیابی کیلئے دعا کی ، وزیرِ اعظم نے زخمیوں کو بہترین طبی سہولیات فراہم کرنے کی ہدایت کی۔ وزیر اعظم آفس کے میڈیا ونگ کی طرف سے جاری بیان کے مطابق وزیر اعظم نے دھماکے میں ملوث افراد کی جلد نشاندہی کرکے انہیں قرار واقعی سزا دلوانے کی ہدایت بھی کی۔
انہوں نے کہا کہ سیاسی جلسے پر حملہ بلوچستان میں دہشتگردوں کی انتشار پھیلانے کی گھناؤنی سازش کا منہ بولتا ثبوت ہے، دہشتگرد بلوچستان کے امن اور ترقی کے دشمن ہیں۔ انہوں نے دہشتگردی کے عفریت کے مکمل خاتمے تک اس کے خلاف جنگ جاری رکھنے کے عزم کا اظہار کرتے ہوئے کہا کہ معصوم و نہتے شہریوں پر دہشتگرد حملے بزدلانہ فعل اور قابل مذمت ہیں۔
