وزیرِ اعظم محمد شہباز شریف کا سٹیٹ بینک کی جانب سے پالیسی ریٹ میں 2 فیصد کمی کا خیر مقدم

اسلام آباد۔12ستمبر (اے پی پی):وزیرِ اعظم محمد شہباز شریف نے سٹیٹ بینک آف پاکستان کی جانب سے پالیسی ریٹ میں 2 فیصد کمی کا خیر مقدم کرتے ہوئے کہا ہے کہ پالیسی ریٹ میں کمی ملکی معیشت کے لئے خوش آئند ہے۔

وزیراعظم آفس کے میڈیا ونگ کی جانب سے جاری اعلامیہ کے مطابق وزیراعظم محمد شہباز شریف نے کہا کہ پالیسی ریٹ میں کمی سے پاکستانی معیشت پر سرمایہ کاروں کا اعتماد بڑھے گا اور سرمایہ کاری میں اضافہ ہو گا۔ انہوں نے کہا کہ افراط زر کی شرح میں تیزی سے ہونے والی کمی کے بدولت شرح سود میں کمی آئی ہے۔

وزیراعظم نے امید ظاہر کی کہ آنے والے مہینوں میں افراط زر میں مزید کمی ہو گی۔ انہوں نے کہا کہ معیشت کی بحالی کے حوالہ سے وفاقی وزیر خزانہ اور دیگر متعلقہ اداروں کی کوششیں لائق تحسین ہیں۔