اسلام آباد۔23مارچ (اے پی پی):وزیرِ اعظم محمد شہباز شریف نے کہا ہے کہ دہشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے ،دہشتگردوں کے ناپاک عزائم کو کبھی کامیاب نہیں ہونے دیں گے ۔ وزیرِ اعظم محمد شہباز شریف نے نوشکی میں پولیس موبائل پر دہشتگردوں کے حملے میں 4 پولیس اہلکاروں کی شہادت پر گہرے دکھ اور رنج کا اظہار کیا۔
پرائم منسٹر آفس میڈیا ونگ کی جانب سے جاری بیان میں وزیرِ اعظم نے شہداء کی بلندی درجات اور اہل خانہ کیلئے صبر کی دعا کرتے ہوئے واقعے کی فوری تحقیقات اور ذمہ داران کے تعین و کارروائی کی ہدایت بھی کی۔
انہوں نے کہا کہ دہشتگردی کے خلاف جنگ میں پولیس و قانون نافذ کرنے والے اداروں کے افسران و اہلکاروں کی عظیم قربانیاں پوری قوم کبھی فراموش نہیں کرے گی۔
وزیرِاعظم نے کہا کہ دہشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے،دہشتگردوں کے ناپاک عزائم کو کبھی کامیاب نہیں ہونے دیں گے،دہشتگرد بلوچستان کی ترقی و امن کے دشمن ہیں۔
Short Link: https://urdu.app.com.pk/urdu/?p=575534
