اسلام آباد ۔ 4 اگست (اے پی پی) وزیر اعظم آزاد کشمیر راجہ فاروق حیدر نے کہا ہے کہ ریاست جموں وکشمیر فاشسٹ مودی کے لئے ترنوالہ ثابت نہیں ہوگی، آزاد کشمیر اور گلگت بلتستان کے لوگ بھارتی زیر قبضہ کشمیر کے عوام کے ساتھ ہیں،وادی کے لوگ اپنی شناخت کی جنگ لڑ رہے ہیں،جموں کے لوگ ان کا ساتھ دیں۔یوم استحصال کے موقع پر وزیر اعظم آزادکشمیر راجہ فاروق حیدر نے اپنے پیغام میں کہا کہ 5 اگست کا بھارتی اقدام کشمیریوں سے ان کی شناخت چھیننے کا مذموم طریقہ ہے،بھارت کے خون آشام وزیراعظم نریندر مودی کو کہتا ہوں ریاست جموں و کشمیر تمہارے لئے تر نوالہ ثابت نہیں ہوگا،ریاست جموں و کشمیر میں بسنے والے مسلمان،ہندو،سکھ،بدھ تمام اس سازش سے اچھی طرح واقف ہیں۔انہوں نے کہا کہ بھارت کشمیریوں کو اپنے ہی ملک میں دوسرے درجے کا شہری بنانا چاہتا ہے،کشمیر کی شناخت کی لڑائی وادی میں لڑی جا رہی ہے جموں کے بھائی اس کا ساتھ دیں،آزادکشمیر ،گلگت بلتستان کے عوام کشمیری بھائیوں کے شانہ بشانہ ہیں۔فاروق حیدرنے کہا کہ اقوام عالم سے کہتا ہوں خطے پر جنگ کے بادل منڈلا رہے ہیں،کب تک آزادکشمیر کے لوگوں کو روکا جائے گا یہ ہمارا حق ہے کہ ہم اپنے بھائیوں کی آزادی کی جدوجہد میں شامل ہوں،اس خطے میں بڑا تصادم ہونے کا خطرہ ہے۔فاروق حیدر نے کہا کہ میں خاص طور پر پی فائیو سے کہنا چاہتا ہوں کہ وہ مداخلت کریں اور بھارت کو روکیں،جب تک اقوام متحدہ کہ قراردادوں کے مطابق ہمیں اپنے مستقبل کا فیصلہ کرنے کا حق نہیں مل جاتا کشمیریوں کی جدوجہد جاری رہے گی۔
