اسلام آباد۔30اگست (اے پی پی):چیئرمین کیپیٹل ڈویلپمنٹ اتھارٹی (سی ڈی اے) و چیف کمشنر اسلام آباد محمد علی رندھاوا کی زیر صدارت سی ڈی اے ہیڈکوارٹرز میں ایک اہم اجلاس منعقد ہوا۔ اجلاس میں سی ڈی اے بورڈ کے ممبر ایڈمن و اسٹیٹ طلعت محمود، ممبر فنانس طاہر نعیم، ممبر انوائرمنٹ اسفندیار بلوچ، ممبر پلاننگ ڈاکٹر خالد حفیظ سمیت متعلقہ افسران نے شرکت کی۔ اجلاس میں دارالحکومت اسلام آباد میں تفریحی اور سیاحت سے متعلق مختلف اقدامات و منصوبوں کی پیشرفت کا تفصیلی جائزہ لیا گیا۔
سی ڈی اے کی جانب سے جاری بیان کے مطابق اجلاس کو بریفننگ دیتے ہوئے بتایا گیا کہ اسلام آباد میں سیاحت کو فروغ دینے کیلئے متعدد تفریحی و سیاحتی منصوبوں پر تیزی سے کام جاری ہے جن میں سی ڈی اے کی نرسری کو گارڈنیا حب بنانا، تھیم پارک، اسلام آباد میں فوڈ سٹریٹ، سفاری پارک، فیری ویلز، ڈانسنگ فاؤنٹین، شہر کے کرکٹ اور فٹبال گراؤنڈ کی اپ گریڈیشن اور پبلک پارکس کو جدید ترین سہولیات سے آراستہ کرنے کے کام شامل ہیں۔
ان تمام اقدامات کا بنیادی مقصد نہ صرف اسلام آباد بلکہ پورے ملک اور دیگر ممالک سے آنے والے شہریوں اور سیاحوں کو عالمی معیار کی سہولیات فراہم کرنا ہے تاکہ دارالحکومت اسلام آباد کو سیاحت کے حوالے سے ایک حب اور مثالی شہر بنایا جاسکے۔اجلاس میں شہر میں ہارٹیکلچر، لینڈ اسکیپنگ اور گرین ایریاز کو مزید وسعت دینے کیلئے سی ڈی اے نرسری کو گارڈینا حب میں تبدیل کرنے کے منصوبے کا جائزہ لیا گیا۔
بریفننگ میں بتایا گیا کہ منصوبہ اپنی تکمیلی مرحلے میں داخل ہوچکا ہے اور اس منصوبہ سے نہ صرف شہر میں گرین ایریاز کو مزید فروغ ملے گا بلکہ شہریوں کو معیاری تفریحی مقام سمیت پودے اور پھول بھی مل سکیں گے اور اسلام آباد کو ماحول دوست گرین شہر بنانے میں مددگار ثابت ہوگا۔اجلاس نے اسلام آباد کے سیاحتی انفراسٹرکچر اور تفریحی سہولیات کو بہتر بنانے کیلئے متعدد اہم اقدامات کا جائزہ لیا۔ ان میں جدید ترین تھیم پارک، بین الاقوامی معیار کے مطابق فیئرز وہیل اور کیبل کار سسٹم تھے۔
ان منصوبوں کی فزیبلٹی اسٹڈیز اور تفصیلی ڈیزائن پر ورکنگ جاری ہے۔ بریفننگ میں مزید بتایا گیا کہ ابتدائی طور پر کنسلٹنٹس تکنیکی اسٹڈی اور فزیبلٹی رپورٹ تیار کریں گے جسکو بعد کے مراحل میں ٹرانزیکشن ایڈوائزرز سیاحتی منصوبوں کو عالمی معیار کے مطابق پایہ تکمیل پہنچانے کیلئے اپنی تکنیکی معاونت بھی فراہم کریں گے۔چیئرمین سی ڈی اے محمد علی رندھاوا نے اسلام آباد شہر کو ایک اعلیٰ سیاحتی مقام کے طور پر متعارف کروانے کی اہمیت پر زور دیا جو کہ مقامی شہریوں اور بڑھتی ہوئی تعداد میں ملکی و بین الاقوامی سیاحوں کی ضروریات پوری کرے۔
یہ منصوبے سی ڈی اے کے عزم کی عکاسی کرتے ہیں کہ وہ بنیادی شہری سہولیات و ضروریات کو پورا کرنے کے ساتھ معیاری تفریحی سہولیات فراہم کرنا چاہتے ہیں۔ ان منصوبوں کا مقصد اسلام آباد کو ایک بین الاقوامی سیاحتی مرکز کے طور پر متعارف کروانا ہے، جو کہ نہ صرف روزگار کے مواقع پیدا کرے بلکہ مقامی کاروبار کو فروغ دے۔چیئرمین سی ڈی اے و چیف کمشنر اسلام آباد محمد علی رندھاوا نے ہدایت کی کہ تمام سیاحتی منصوبوں کو مقررہ وقت کے اندر مکمل کرنے کیلئے کام کی رفتار میں مزید اضافہ کیا جائے تاکہ شہریوں کو بہترین سہولیات فراہم کی جاسکیں اور اسلام آباد کو دنیا کا خوبصورت ترین شہر بنایا جا سکے ۔
اجلاس کے اختتام پر چیئرمین سی ڈی اے و چیف کمشنر اسلام محمد علی رندھاوا نے کہا کہ وزیر اعظم پاکستان اور وفاقی وزیر داخلہ کے ویژن کے مطابق سی ڈی اے اسلام آباد کی ترقی اور خوبصورتی کیلئے انتہائی پرعزم ہے۔
انہوں نے کہا کہ یہ تمام منصوبے نہ صرف شہر کی خوبصورتی میں اضافہ کریں گے بلکہ شہر کو ایک بہترین تفریحی و سیاحتی مرکز کے طور پر متعارف کرائیں گے ۔ انہوں نے کہا کہ ان منصوبوں کے تمام ترقیاتی کاموں میں شفافیت، معیار اور بروقت تکمیل کو ہر حال میں یقینی بنایا جائے۔ چیئرمین سی ڈی اے نے کہا کہ ہم سب کی ذمہ داری ہے کہ اسلام آباد کو دنیا کا خوبصورت ترین ، ماحول دوست اور جدید ترین دارالحکومت بنائیں۔
