اسلام آباد ۔ 16 دسمبر (اے پی پی) وزیراعظم عمران خان نے سانحہ آرمی پبلک سکول کی چوتھی برسی کے موقع پر اتوار کو اپنے خصوصی پیغام میں اس عزم کا اعادہ کیا ہے کہ حکومت پاکستان کو ایک ایسی ریاست بنائے گی جہاں پر مذہبی ، لسانی ، ذات برادری اور رنگ ونسل کی بنیاد پر فرقہ پرستی، انتہا پسندی اور تشدد کی کوئی گنجائش نہیں ہوگی۔ انہوں نے کہا کہ تعلیم ہی ایک ایسا ہتھیار ہے جس سے انتہا پسندی اور دہشتگردی کا مستقل خاتمہ کیا جاسکتا ہے۔ وزیراعظم ہائوس کی جانب سے جاری کردہ بیان کے مطابق وزیراعظم عمران خان نے کہا کہ 16 دسمبر کا دن ہمیں اس سیاہ دن کی یاد دلاتا ہے جب دہشت گردوں نے انسانیت اور مذہب کے تمام تقاضوں کو بالائے طاق رکھتے ہوئے آرمی پبلک سکول پشاور کے ان معصوم بچوں کو نشانہ بنایا جو حصول تعلیم اور ایک روشن مستقبل کی امید لئے سکول آئے۔ معصو م جانوں کی شہادت کے اس دلخراش واقعے نے جہاں پوری قوم کوکرب و غم میں مبتلا کیا وہاں قوم میں دہشت گردی کے خلاف یکجہتی اور وحدت کو جنم دیا۔ اللہ تعالیٰ کی مدد اور پوری قوم کی حمایت سے ہماری بہادر افواجِ پاکستان اور قانون نافذ کرنے والے دیگر اداروں نے آپریشن ضرب ِعضب اور ردالفسادکے ذریعے دہشت گردی کے خلاف وہ فیصلہ کن معرکہ سر انجام دیا جس کی مثال نہیں ملتی۔معصوم جانوں نے اپنے بے گناہ لہو کا نذرانہ دے کرقوم کو ہمیشہ کے لئے ایک ایسے سفاک دشمن کے خلاف متحد کر دیا جو انسانیت کے نام پر دھبہ اور حیوانیت کی بدترین مثال ہے۔ سانحہ اے پی ایس پشاور میں بچھڑ جانے والوں کی یاد ہمیشہ موجود رہے گی۔آج کے دِن میں اے پی ایس کے معصوم شہیدوں کو خراجِ تحسین پیش کرنے کے ساتھ ساتھ اْن غمزدہ والدین سے دِلی ہمدردی کا اظہار کرتا ہوں جنہوں نے اپنے لخت جگر تعلیم کے حصول کے لیے بھجوائے تھے مگر وہ شہادت کی قبا ا وڑھے گھروں کولوٹے۔پوری قوم معصوم شہداء کے ان والدین کے دکھ میں برابر کی شریک ہے۔ پاکستانی قوم نے دہشت گردی کے خلاف جنگ میں وہ قیمت ادا کی جس کا کوئی تخمینہ نہیں لگایا جاسکتا۔ ہزاروں جانوں کی قربانی دینے اور بے انتہا معاشی نقصانات اٹھانے کے باوجود اگر آج بھی کوئی پاکستان پر الزام تراشی کرتا ہے یا ہمیں کسی صورت موردِ الزام ٹھہراتا ہے تو ہم اس پر یہ واضح کردینا چاہتے ہیں کہ دنیا کی اس جنگ کی سب سے بھاری قیمت ہماری افواج، سپاہیوں، نہتے شہریوں اور معصوم جانوں نے ادا کی ہے۔ میں یہ بھی واضح کردینا چاہتا ہوں کہ بے انتہاء نقصانات کے باوجود ہم بحثیت قوم ملکی، علاقائی اور عالمی امن کے لئے پرعزم ہیں۔ آج کے دِن کی مناسبت سے میں اس بات کا بھی اعادہ کرنا چاہتا ہوں کہ تعلیم ہی وہ ہتھیار ہے جس کی بدولت ہم انتہا پسندی اور دہشت گردی کو مستقل طور پرمات دے سکتے ہیں۔ہماری حکومت پر عزم ہے کہ ہم پاکستان کو ایسا معاشرہ بنائیں گے جہاں فرقہ واریت، مذہب، لسانیت، رنگ و نسل یا کسی بھی طرز پر انتہا پسندی اور تشدد کو برداشت نہیں کیا جائے گا۔ آج کے دن میں اپنی بہادر افواج پاکستان اور قانون نافذ کرنے والے تمام اداروں کے اْن ہیروز کو سلام پیش کرتا ہوں جنہوں نے دہشت گردی کے خلاف جنگ میں قربانیاں دی ہیں۔اپنے شہیدوں کو خراجِ تحسین پیش کرنے کا سب سے بہترین طریقہ اس مقصد کے لئے پرعزم رہنا ہے جس عظیم مقصد کے لئے انہوں نے اپنی جانیں قربان کیں۔
Short Link: https://urdu.app.com.pk/urdu/?p=126265
