اسلام آباد۔8جولائی (اے پی پی):وزیر اعظم لیپ ٹاپ سکیم فیز 4 کے تحت تیسری خصوصی کمیٹی کا اعلیٰ سطحی اجلاس منگل کو منعقد ہوا۔اجلاس کی مشترکہ صدارت وفاقی وزیر برائے تعلیم و پیشہ وارانہ تربیت ڈاکٹر خالد مقبول صدیقی اور وزیر اعظم یوتھ پروگرام کے چیئرمین رانا مشہود احمد خان نے کی۔ وفاقی وزیر برائے عوامی امور رانا مبشر اقبال اور وفاقی وزیر اطلاعات و نشریات عطا اللہ تارڑ نے بھی اجلاس میں شرکت کی۔اجلاس میں علاقائی سطح پر درخواستوں کی تقسیم اور کوٹہ کی تفصیل سے جائزہ لیا گیا۔
لیپ ٹاپ سکیم کی تقاریب کے لئے ایک خصوصی میڈیا مہم شروع کرنے پر بھی غور کیا گیا۔وزارتِ اطلاعات و نشریات کے تعاون سے ایک مشترکہ میڈیا آگاہی مہم کا آغاز کیا جائے گا۔وفاقی وزیر تعلیم ڈاکٹر خالد مقبول صدیقی نے کہا کہ لیپ ٹاپ سکیم کی میڈیا مہم کی قیادت وزارتِ اطلاعات کرے گی۔انہوں نے کہا کہ لیپ ٹاپ سکیم کی مرکزی افتتاحی تقریب 25 جولائی کو جناح کنونشن سینٹر میں منعقد ہوگی۔رانا مشہود احمد خان کے مطابق لیپ ٹاپ سکیم کی دیگر علاقائی تقاریب بعد میں منعقد کی جائیں گی جن کی تاریخوں کا اعلان جلد کیا جائے گا۔
ڈاکٹر خالد مقبول صدیقی نے کہا کہ یہ سکیم وزیر اعظم شہباز شریف کے نوجوانوں کو بااختیار بنانے کے وژن کا حصہ ہے۔انہوں نے مزید کہا کہ نوجوانوں کی ٹیکنالوجی تک رسائی قومی ترقی کی ضمانت ہے۔رانا مشہود احمد خان نے اس موقع پر کہا کہ نوجوانوں کو بااختیار بنانا پاکستان کے مضبوط اور روشن مستقبل کی بنیاد ہے۔
