تاشقند۔26فروری (اے پی پی):وزیر اعظم محمد شہباز شریف ازبکستان کا دو روزہ سرکاری دورہ مکمل کرکے تاشقند سے اسلام آباد روانہ ہو گئے ۔ازبکستان کے وزیر اعظم عبداللہ عاریپوف، ازبک وزیر خارجہ بختیار سیدوف، تاشقند کے میئر شوکت عمرزاکوف، ازبکستان کے پاکستان میں سفیر علی شیر تختائیف اور پاکستان کے ازبکستان میں سفیر احمد فاروق سمیت اعلی سفارتی و سرکاری اہلکاروں نے وزیر اعظم کو الوداع کیا۔ تاشقند ہوائی اڈے پر وزیر اعظم اور پاکستانی وفد کو الوداع کرنےکیلئے ازبک مسلح افواج کا چاق و چوبند دستہ بھی موجود تھا۔
وزیر اعظم نے ازبکستان میں یادگار آزادی کا دورہ کیا اور پھولوں کی چادر چڑھائی۔ وزیر اعظم نے ازبکستان کی ترقی و خوشحالی کیلئے نیک خواہشات کا اظہار کیا اور صدر شوکت مرزایوف کے ازبکستان کی ترقی کے وژن کی تعریف کی۔ وزیر اعظم کی اپنے دورے کے دوران ازبک صدر شوکت مرزایوف سے دوطرفہ ملاقات ہوئی جس کے بعد دونوں ممالک کے وفود کی سطح پر بھی ملاقات ہوئی۔
ملاقات میں ازبکستان اور پاکستان کے مابین تجارت کے حجم کو 2 ارب ڈالر تک پہنچانے، علاقائی روابط کے فروغ کیلئےازبکستان-افغانستان-پاکستان ریلوے منصوبے پر عملدرآمد پر اتفاق ہوا۔ دونوں ممالک کے مابین مختلف شعبوں میں تعاون کی مفاہمتی یادداشتوں و معاہدوں کا بھی تبادلہ ہوا۔
وزیر اعظم اور ازبک صدر شوکت مرزا یوف نے مشترکہ پریس کانفرنس میں پاکستان اور ازبکستان کے تاریخی برادرانہ تعلقات کا ذکر کرتے ہوئے مختلف شعبوں میں باہمی تعاون کے مزید فروغ پر زور دیا۔ وزیر اعظم اور پاکستانی وفد نے صدر شوکت مرزا یوف کی جانب سے ظہرانے میں بھی شرکت کی۔
Short Link: https://urdu.app.com.pk/urdu/?p=566680
